ۇلتتىق مۋزەيدە «مۇراداعى ورنەكتەر: وزبەكستاننىڭ كەستە جانە تىگىن داستۇرلەرىنە ساياحات» اتتى حالىقارالىق كورمە اشىلدى، دەپ حابارلايدى aqshamnews.kz
ەكسپوزيسيادا وزبەكستاننىڭ 6 جەتەكشى مۋزەيى قورىنان 122 بىرەگەي قولونەر تۋىندىسى ۇسىنىلدى:
وزبەكستاننىڭ قولدانبالى ونەر مەملەكەتتىك مۋزەيى؛
تيمۋريدتەر تاريحىنىڭ مەملەكەتتىك مۋزەيى؛
سامارقاند مەملەكەتتىك مۋزەي-قورىعى؛
وزبەكستان مەملەكەتتىك ونەر مۋزەيى؛
ي.ۆ. ساۆيسكيي اتىنداعى قاراقالپاقستان مەملەكەتتىك ونەر مۋزەيى؛
بۇحارا مەملەكەتتىك مۋزەي-قورىعى.
كورمەگە XIX-XX عع. تيەسىلى التىن جىپپەن كەستەلەنگەن ۇلتتىق كيىم ۇلگىلەرى، زەرگەرلىك بۇيىمدار، ءداستۇرلى اياق كيىم مەن اكسەسسۋارلاردىڭ بىرەگەي ۇلگىلەرى قويىلدى. بۇل ونەر تۋىندىلارى – قولدان جاسالعان جاۋھارلار عانا ەمەس، سونىمەن قاتار ورتالىق ازيانىڭ مادەني مۇراسىن بەينەلەيتىن تەرەڭ ءسيمۆوليزمنىڭ كورىنىسى.
«بۇل كورمەنىڭ بىرەگەيلىگى – وزبەكستاننىڭ جەتەكشى مۋزەيلەرىنىڭ باعا جەتپەس جادىگەرلەرىمەن تانىسۋعا مۇمكىندىك بەرۋىندە. وسىنداي ماڭىزدى شارانى ۇيىمداستىرعان ارىپتەستەرىمىزگە شىنايى العىسىمىزدى بىلدىرەمىز. مۇنداي ءىس-شارالار مادەني بايلانىستاردى نىعايتىپ، حالىقتار اراسىنداعى دوستىقتى تەرەڭدەتۋگە زور ۇلەس قوسادى»، - دەپ اتاپ ءوتتى ق ر مادەنيەت جانە اقپارات ۆيسە-مينيسترى ەۆگەنيي كوچەتوۆ.
كورمە 2025 جىلدىڭ 1 ماۋسىمىنا دەيىن كوپشىلىك نازارىنا ۇسىنىلادى.