AUYL SPORT جوباسى ءوزىنىڭ اۋقىمىن كەڭەيتىپ، اۋىلدىق جەرلەردە جاڭا سپورت ءتۇرى – ۇستەل تەننيسىن ەنگىزۋدى جوسپارلاپ وتىر. بۇل باستاما Halyk قايىرىمدىلىق قورى مەن قازاقستان رەسپۋبليكاسىنىڭ ۇستەل تەننيسى فەدەراسياسى اراسىنداعى ىنتىماقتاستىقتىڭ ناتيجەسىندە جۇزەگە اسۋدا، دەپ حابارلايدى aqshamnews.kz
نەگىزگى ماقسات – اۋىلدىق ايماقتاردا ۇستەل تەننيسىن دامىتۋ، بالالاردى سپورتقا تارتۋ، سونداي-اق جاتتىقتىرۋشىلار مەن تورەشىلەردىڭ بىلىكتىلىگىن ارتتىرۋ. AUYL SPORT جوباسى ارقىلى اۋىل بالالارى جاڭا مۇمكىندىكتەرگە قول جەتكىزىپ، ءوز قابىلەتتەرىن شىڭداي الادى. جوبا اياسىندا تاراپتار ادىستەمەلىك قولداۋ كورسەتۋ، جارىستار مەن باسقا دا سپورتتىق شارالاردى ۇيىمداستىرۋ بويىنشا كەلىسىمگە كەلگەن. بۇل ىنتىماقتاستىق سونىمەن قاتار قايىرىمدىلىق مادەنيەتىن قالىپتاستىرۋ مەن بۇقارالىق سپورتتى دامىتۋعا باعىتتالعان.
"اۋىلداعى سپورتتى دامىتۋ – ءبىزدىڭ قوردىڭ باستى مىندەتتەرىنىڭ ءبىرى. ءبىز وڭىرلەردە بۇقارالىق سپورتتى قولداۋ ماقساتىندا كوپتەگەن جوبالاردى ىسكە اسىرىپ كەلەمىز. AUYL SPORT جوباسىنا ۇستەل تەننيسىنىڭ قوسىلۋى – بالالار مەن جاسوسپىرىمدەر ءۇشىن ۇلكەن مۇمكىندىك،" – دەپ اتاپ ءوتتى Halyk قورىنىڭ اتقارۋشى ديرەكتورى عالىمبەك جاقسىلىقوۆ.
ۇستەل تەننيسى – الەمدەگى ەڭ قولجەتىمدى سپورت تۇرلەرىنىڭ ءبىرى، ويتكەنى ول قىمبات جابدىقتاردى قاجەت ەتپەيدى جانە اۋىلدىق مەكتەپتەردە دە ۇيىمداستىرۋعا بولادى. قازاقستاندا ۇستەل تەننيسى سپورتىن دامىتۋ جالعاسۋدا، ال AUYL SPORT جوباسى ارقىلى اۋىل بالالارىندا كاسىبي دەڭگەيگە جەتۋ مۇمكىندىگى پايدا بولادى.
AUYL SPORT – بولاشاق چەمپيوندارعا ارنالعان الاڭ
2024 جىلى ىسكە قوسىلعان AUYL SPORT جوباسى اۋىل بالالارى ءۇشىن ەڭ ءىرى سپورتتىق باستامالاردىڭ بىرىنە اينالدى. وتكەن جىلى 200 ەلدى مەكەننەن 12 000 جاس سپورتشى وڭىرلىك تۋرنيرلەرگە قاتىسىپ، فينالعا 17 وڭىردەن 1 300 ۇزدىك قاتىسۋشى جەتتى. جوبادا ءقازىردىڭ وزىندە بوكس، كۇرەس، كاراتە، باسكەتبول، ۆولەيبول جانە شاحمات بار، ال 2025 جىلدان باستاپ ۇستەل تەننيسى سپورت ءتۇرى قوسىلادى.
2016 جىلدان بەرى Halyk قورى ءبىلىم بەرۋ، دەنساۋلىق ساقتاۋ جانە سپورتتى دامىتۋعا باعىتتالعان 120-دان استام الەۋمەتتىك جوبانى جۇزەگە اسىردى.
AUYL SPORT – بالالارعا سپورتقا قولجەتىمدىلىك بەرىپ، ولاردىڭ مىنەز-قۇلقىن قالىپتاستىرىپ، جاڭا مۇمكىندىكتەر اشاتىن ماڭىزدى باستاما. بۇل جوبا ءاربىر بالانىڭ تۇرعىلىقتى جەرىنە قاراماستان، سپورتپەن اينالىسۋىنا مۇمكىندىك بەرەدى جانە ولاردىڭ تاعدىرىن وزگەرتەدى.
"AUYL SPORT – بۇل Halyk قورىنىڭ قازاقستاننىڭ بولاشاعىنا سالعان ينۆەستيسياسى. ءار بالانىڭ ءوز الەۋەتىن اشۋعا مۇمكىندىگى بولۋى قاجەت،" – دەيدى عالىمبەك جاقسىلىقوۆ.