2023 جىلدىڭ 27 ماۋسىم كۇنى ق ر ۇلتتىق مۋزەيىندە قازاقستانداعى بۇقارالىق اقپارات قۇرالدارى قىزمەتكەرلەرىنىڭ كۇنىنە وراي «قازاق جۋرناليستيكاسى: وتكەنى مەن بۇگىنى» اتتى كورمەنىڭ سالتاناتتى اشىلۋ ءراسىمى ءوتتى.
بۇل تۋرالى Almaty-akshamy.kz حابارلايدى ۇلتتىق مۋزەيدىڭ باسپا ءسوز قىزمەتىنە سىلتەمە جاساپ.
اتالمىش شارانى ق ر اقپارات جانە قوعامدىق دامۋ مينيسترلىگى مەن ق ر مادەنيەت جانە سپورت مينيسترلىگى بىرلەسە ۇيىمداستىردى.
كورمەگە قازاق باسپا ءسوز باسىلىمدارىنىڭ، راديوسىنىڭ، تەليەۆيزياسىنىڭ تاريحىنان سىر شەرتەتىن ەكسپوناتتار قويىلدى.
«ءبىز وسى سالاعا جاۋاپتى مينيسترلىك رەتىندە جۋرناليستەرگە تارتۋ جاساۋدى ويلاعان ەدىك. ەندى ولاردىڭ ىشىندە، ارينە، بىرنەشە جوسپارىمىز بار. بۇگىن سولاردىڭ العاشقىسى رەتىندە مادەنيەت مينيسترلىگىنىڭ دە، وسى ۇلتتىق مۋزەيدىڭ دە قولداۋىمەن ارنايى باسپا ءسوز كورمەسىن اشۋدى ءجون كوردىك. وسىعان قولعانات جاساعان، كومەك كورسەتكەن ءبىزدىڭ ارىپتەستەرىمىزدىڭ بارشاسىنا شىنايى ريزاشىلىق بىلدىرەمىن»،- دەدى ق ر اقپارات جانە قوعامدىق دامۋ ءمينيسترى دارحان ءقىدىرالى.
سونىمەن قاتار دارحان قۋاندىق ۇلى «قازاق» گازەتىنىڭ العاشقى سانى 2 اقپان كۇنى جارىق كورۋىنە وراي وسى كۇندى قازاق ۇلتتىق ءباسپاسوزىنىڭ كۇنى دەپ جاريالاۋ تۋرالى ۇسىنىس بولعانىن جانە بۇل ۇسىنىستىڭ قولداۋ تاپقانىن حابارلادى.
«مەنىڭ ويىمشا ادامعا كوڭىل-كۇي سىيلايتىن كاسىپتەردىڭ ىشىندە ەكى كاسىپ بار، ونىڭ ءبىرى – جۋرناليستيكا، ەكىنشىسى – مادەنيەت، سەبەبى ادام بالاسى جاقسى جاڭالىق ەستىسە، جاقسى حابار ەستىسە قۋانادى، كوڭىلى مارقايادى جانە دە ادەمى اۋەن تىڭداسا، ادەمى، مىنانداي ءبىزدىڭ ونەر ادامدارىنىڭ قولىنان شىققان كارتينالاردى كورسە كوڭىلدەرى كوتەرىلەدى، سوندىقتان ءبىز تاڭداعان ماماندىقتاردىڭ ادام بالاسىنا پايداسى زور دەپ ەسەپتەيمىن»،- دەدى ق ر مادەنيەت جانە سپورت ۆيسە-مينيسترى نۇرقيسا داۋەشوۆ ءوزىنىڭ قۇتتىقتاۋ سوزىندە.
كورمەنىڭ اشىلۋىنا قازاق جۋرناليستيكاسىنىڭ ارداگەرلەرى ساۋىتبەك ابدراحمانوۆ پەن الىبەك اسقاروۆ قاتىسىپ، ب ا ق قىزمەتكەرلەرىنە وزدەرىنىڭ جۇرەكجاردى اق تىلەكتەرىن جەتكىزدى.
كورمە 16 شىلدەگە دەيىن جالعاسادى.