ب ا ق قىزمەتكەرلەرى كۇنىنە وراي پوليسيا ۆەدومستۆوسىندا ىشكى ىستەر ورگاندارىنىڭ باسپا ءسوز قىزمەتى مەن مەديا-ورتالىعىنىڭ قىزمەتكەرلەرى ماراپاتتالدى، – دەپ حابارلايدى Almaty-akshamy.kz Polisia.kz-كە سىلتىمە جاساپ.
شاراعا اقپارات جانە قوعامدىق دامۋ ءمينيسترى دارحان ءقىدىرالى مەن تاۋەلسىز قازاقستاندا جارىققا شىققان «ساقشى» گازەتىنىڭ ءبىرىنشى باس رەداكتورى مارقۇم بازارباي يسايەۆتىڭ جارى قۇلان ىسقاقوۆا قاتىستى. سونداي-اق كەزدەسۋگە ونلاين-فورماتتا اۋماقتىق پوليسيا بولىنىستەرىنىڭ باستىقتارى مەن وڭىرلىك باسپا ءسوز قىزمەتتەرىنىڭ جەتەكشىلەرى قوسىلدى.
– قاۋىپسىزدىك كەپىلى – پوليسيا تۋرالى جازىپ، كورسەتىپ، قىزمەتكەرلەردىڭ ەرەن ەڭبەگىن جۇرتقا پاش ەتىپ جۇرگەن باسپا ءسوز قىزمەتىنىڭ ورنىن ەرەكشە اتاپ وتكەن ءجون. ايماقتاعى جاڭالىقتارمەن ءبولىسىپ، ۆەدومستۆونىڭ اشىقتىعىن دارىپتەپ كەلە جاتقان قانشاما ماماندار بار. ءتارتىپ ساقشىلارىنىڭ ءيميدجىن قالىپتاستىراتىن دا سولار. پوليسيا بولىنىستەرىنىڭ باسپا ءسوز حاتشىلارىمەن ەتەنە جاقىن جۇمىس ىستەپ، ىشكى ىستەر ورگاندارىنىڭ بەدەلىن ارتتىرۋعا ۇلەس قوسىپ جۇرگەن مەديا-ورتالىق ۇجىمىن دا اتاپ وتكىم كەلەدى، – دەدى مارات احمەتجانوۆ.
اقپارات جانە قوعامدىق دامۋ ءمينيسترى دارحان ءقىدىرالى ءىىم باسپا ءسوز قىزمەتىنە اقپارات بەرۋدەگى جەدەلدىگى مەن كاسىبيلىگى ءۇشىن العىسىن ءبىلدىردى. ءىس-شارا بارىسىندا اقپاراتتىق سالادا جۇمىس ىستەيتىن ءبىرقاتار قىزمەتكەر “اقپارات سالاسىنىڭ ۇزدىگى” توسبەلگىسىمەن، گراموتالارمەن جانە العىس حاتتارمەن ماراپاتتالدى.
– قازاقتىڭ قوعام قايراتكەرى ءمىرجاقىپ دۋلاتوۆ ايتقانداي: «قاي ەلدىڭ ءباسپاسوزى مىقتى بولسا، سول ەلدىڭ ءوزى دە مىقتى». بارشاڭىزدى كاسىبي مەرەكەمەن شىن جۇرەكتەن قۇتتىقتايمىن! وسىنداعى اربىرىڭىزگە شىعارماشىلىق شابىت، تولاعاي تابىس تىلەيمىن! – دەدى ءىىم باسشىسى.
جيىن سوڭىندا مارات احمەتجانوۆ مەرەكەگە وراي دارحان قىدىرالىگە «قۇقىق ءتارتىبىن قامتاماسىز ەتۋگە قوسقان ۇلەسى ءۇشىن» مەدالىن تابىستاپ، «سەرت» دەتەكتيۆ شىعارمالار جيناعىن سىيعا تارتتى. ايتا كەتەيىك، ىشكى ىستەر ورگاندارىنىڭ جۇمىسى تۋرالى باياندايتىن «ساقشى» جانە «نا ستراجە» گازەتتەرىنە بيىل 90 جىل.