مەملەكەتكە اسا ءىرى مولشەردە زالال كەلتىرىلدى
ق ر سىبايلاس جەمقورلىققا قارسى ءىس-قيمىل اگەنتتىگى ۇلتتىق مۋزەي باسشىلىعىنا قاتىستى قىلمىستىق ءىستى تەرگەپ-تەكسەرۋدى جالعاستىرىپ جاتىر. بۇل تۋرالى اتالعان اگەنتتىكتەن ءمالىم ەتتى، دەپ حابارلايدى Almaty-akshamy.kz.
بۇگىندە نۇر-Cۇلتان قالاسى بويىنشا Cىبايلاس جەمقورلىققا قارسى قىزمەت ۇلتتىق مۋزەي باسشىلىعىنا جانە باسقا دا تۇلعالارعا قاتىستى سوتقا دەيىنگى تەرگەۋ جۇرگىزىپ جاتىر. كۇدىكتىلەرگە 2017-2018 جىلدارى «اقپاراتتىق رەسۋرستاردا وبەكتىلەردى تانىمال ەتۋ ءۇشىن جالپىۇلتتىق تىزبەگە ەنگىزىلگەن وبەكتىلەردىڭ 3D مودەلىن قۇرۋ» جوباسىن ىسكە اسىرۋ كەزىندە اسا ءىرى مولشەردە بيۋدجەت قاراجاتىن جىمقىردى دەگەن ايىپ تاعىلىپ وتىر.
«ۇلتتىق مۋزەي مەردىگەر ۇيىمدارعا اتالعان جوبا اياسىندا اتقارىلعان جۇمىستار ءۇشىن 1،3 ملرد تەڭگە تولەگەن.
بۇل رەتتە جۇرگىزىلگەن ساراپتامالىق زەرتتەۋ جۇمىستاردىڭ ناقتى قۇنى 83،4 ملن تەڭگەنى قۇراعانىن انىقتادى.
وسىلايشا، جۇمىس قۇنى 1،2 ملرد تەڭگەگە نەگىزسىز ۇلعايتىلىپ، مەملەكەتكە اسا ءىرى مولشەردە زالال كەلتىرىلدى.
تەرگەپ-تەكسەرۋ امالدارى جالعاسۋدا. وزگە اقپارات تەرگەۋ مۇددەسىنە وراي جاريا ەتۋگە جاتپايدى»، - دەلىنگەن ق ر سىبايلاس جەمقورلىققا قارسى ءىس-قيمىل اگەنتتىگىنىڭ حابارلاماسىندا.
ەسكە سالايىق، بيىلعى مامىر ايىندا ۇلتتىق مۋزەي ديرەكتورى ارىستانبەك مۇحامەدي ۇلى ۇستالىپ، وعان قاتىستى «كۇزەتپەن ۇستاۋ» بۇلتارتپاۋ شاراسى قولدانىلعانى ءمالىم ەتىلدى.
ول ۋاقىتتا انتيكور قىزمەتى ق ر ۇلتتىق مۋزەيىنىڭ لاۋازىمدى قىزمەتكەرلەرىنە جانە باسقا دا تۇلعالارعا بيۋدجەت قاراجاتىنىڭ 146 ملن تەڭگە سوماسىن جىمقىردى دەگەن ايىپ تاعىلعانى تۋرالى ايتىلعان ەدى. بۇل قاراجات «التىن ادامنىڭ الەم مۋزەيلەرىنە شەرۋى» حالىقارالىق كورمەسىن وتكىزۋ جونىندەگى مەملەكەتتىك ساتىپ الۋ تۋرالى شارت اياسىندا قولدى بولعانى ءمالىم ەتىلدى.