جوبانىڭ ەرەكشەلىگى – دەپۋتاتتار مەن زيالى قاۋىم وكىلدەرىن تارتا وتىرىپ ماڭىزدى ماسەلەردى تالقىلاۋ جانە وسى باعىتتاعى ناقتى ءىس-شارالاردى انىقتاۋ.
سەنات ءتوراعاسى ماۋلەن اشىمبايەۆتىڭ مالىمەتىنشە، ق ر پارلامەنتى سەناتى جانىنان «ۇلتتىق مۇددە» اتتى جاڭا ديالوگ الاڭى قۇرىلدى، دەپ حابارلايدى Almaty-akshamy.kz
«وتىرىسىمىزعا مەملەكەت جانە قوعام قايراتكەرلەرى، دەپۋتاتتارىمىز، ادەبيەتىمىزدىڭ، مادەنيەتىمىزدىڭ، عىلىمنىڭ بەلگىلى وكىلدەرى قاتىسىپ وتىر. بارشاڭىزعا ۋاقىت تاۋىپ، بۇگىنگى وتىرىسقا قاتىسىپ وتىرعاندارىڭىز ءۇشىن ريزاشىلىعىمىزدى بىلدىرەمىز. قازىرگى تاڭدا ەلىمىزدە ۇلكەن تاريحي كەزەڭ باستالۋدا. پرەزيدەنتىمىز قاسىم-جومارت كەمەل ۇلى توقايەۆتىڭ باستاماسىمەن جاڭا قازاقستاندى قۇرۋدى قولعا الدىق. بۇل كۇردەلى وزگەرىستەردىڭ جەدەلدەۋىنە قاسىرەتتى قاڭتار وقيعاسىنىڭ دا اسەرى زور بولدى. ەندىگى جەردە وتكەن قايعىلى وقيعالاردى ساراپتاپ، ولاردان دۇرىس قورىتىندى شىعارۋ اسا ماڭىزدى. بۇل ءبىزدىڭ باياندى بولاشاعىمىز ءۇشىن شەشۋشى مانگە يە»، - دەدى ءىس-شارانى اشقان سەنات ءتوراعاسى.
ونىڭ ايتۋىنشا، جاڭا قازاقستاندى قۇرۋ جولىندا دەپۋتاتتارعا زيالى قاۋىممەن، اقىن-جازۋشىلارمەن، عالىمدارمەن اقىلداسىپ، پىكىرلەسىپ وتىرۋدىڭ ماڭىزى زور.
«سول ماقساتپەن سەنات جانىنان جاڭا ديالوگ الاڭىن قۇرىپ جاتىرمىز. ونىڭ اتىن «ۇلتتىق مۇددە» دەپ اتاۋدى ۇسىنىپ وتىرمىز. ءقازىر ءارتۇرلى پىكىرتالاس الاندارى جەتەرلىك ەكەنى بەلگىلى. ءبىزدىڭ جوبانىڭ ەرەكشەلىگى – دەپۋتاتتار مەن زيالى قاۋىم وكىلدەرىن تارتا وتىرىپ، ۇلتتىق مۇددەمىزگە، ۇلتتىق قۇندىلىقتارعا، ۇلتتىڭ بولاشاعىنا قاتىستى ماڭىزدى ماسەلەردى تالقىلاۋ جانە وسى باعىتتاعى ناقتى ءىس-شارالاردى انىقتاۋ. ءارى قاراي ولاردىڭ جۇزەگە اسىرىلۋىنا ۇيىتقى بولۋ. وسىنداي ماقساتپەن وسى ديالوگ الاڭىن ۇيىمداستىرىپ وتىرمىز. ونىڭ جۇمىسىنا وزدەرىڭىز، باسقا دا ازاماتتار بەلسەندى قاتىسادى دەپ سەنەمىز»، - دەدى ماۋلەن اشىمبايەۆ.