ەلدەگى ساياسي ناۋقانعا الماتىلىقتار بەلسەندى ءارى كوتەرىڭكى كوڭىل-كۇيمەن اتسالىسۋدا. ءتىپتى، كەيبىر داۋىس بەرۋشىلەر كيىم ۇلگىسىمەن دە ەرەكشەلەندى، - دەپ حابارلايدى almaty-akshamy.kz
قىزىل بەشپەتى انادايدان كوزگە تۇسكەن ارۋعا جاقىنداپ ءجون سۇرادىق. ءوزىن اراي قاسىمبايەۆا دەپ تانىستىرعان قالا تۇرعىنى الماتى قالالىق ءبىلىم بەرۋدەگى جاڭا تەحنولوگيالاردىڭ ادىستەمەلىك ورتالىعىندا قىزمەت اتقارادى ەكەن. داۋىس بەرۋگە وتباسىمەن كەلىپتى.
«تۇرعىلىقتى جەرىمىز بويىنشا №75 سايلاۋ ۋچاسكەسىنە تىركەلگەن ەكەنبىز. ازاماتتىق كوزقاراسىمىزدى تانىتۋدى پارىزىمىز دەپ وتباسىمىزبەن داۋىس بەرۋگە كەلدىك. ۇلىم سەرجان بيىل 18-گە تولدى. العاش رەت داۋىس بەرمەك. بۇگىنگى كۇن ناۋرىز مەرەكەسىمەن تۇسپا-تۇس كەلگەندىكتەن، وسىلايشا ۇلتتىق ناقىشتاعى كيىم ۇلگىسىمەن كەلگەندى ءجون سانادىم. بۇگىن بۇكىل ەل ءۇشىن ماڭىزدى قادام جاسايتىن كۇن. سوندىقتان بارلىعىمىز ەلىم، جەرىم دەيتىن كانديداتقا داۋىس بەردىك دەپ ەسەپتەيمىز. ءبىز ادىلەتتى قازاقستاننىڭ بولاشاعىنا سەنەمىز!»، – دەيدى اراي يمانبەك قىزى.