الماتى قالاسىندا ق ر پرەزيدەنتى جانىنداعى قازاقستان ۇلتتىق عىلىم اكادەمياسىنىڭ جاڭا سايلانعان اكادەميكتەرىنىڭ تانىستىرىلىمى ءوتتى.
ءىس-شاراعا ق ر عىلىم جانە جوعارى ءبىلىم ۆيسە-مينيسترى دارحان احمەد-زاكي، سونداي-اق عالىمدار، قوعام قايراتكەرلەرى مەن قۇرمەتتى قوناقتار قاتىستى.
"عىلىم ورداسى" عىلىمي-مۋزەي كەشەنىنىڭ كەڭ زالىندا وتكەن بۇل سالتاناتتى جيىن ەل ومىرىندەگى ماڭىزدى وقيعاعا اينالدى. قازاقستان ۇلتتىق عىلىم اكادەمياسىنىڭ پرەزيدەنتى اقىلبەك كۇرىشبايەۆ ءوز سوزىندە عىلىمدى الەمدىك تاجىريبە نەگىزىندە قايتا جاڭعىرتۋ باعىتىنداعى ماڭىزدى جۇمىستار اتقارىلعانىن اتاپ ءوتتى.
– بيىل عىلىم سالاسىندا كوپتەگەن ماڭىزدى وقيعالار بولدى. مەملەكەت باسشىسىنىڭ تاپسىرماسى بويىنشا ۇلتتىق عىلىم اكادەمياسىنىڭ قىزمەتىن تۇبەگەيلى وزگەرتۋ جانە ونى عىلىمي ويدىڭ ورتالىعىنا اينالدىرۋ ءۇشىن اۋقىمدى جۇمىستار اتقارىلدى. بۇگىندە اكادەميا ەلىمىزدىڭ جەتەكشى عالىمدارىنىڭ باسىن قوسقان جوعارى عىلىمي ۇيىم رەتىندە تانىلدى. قازىرگى تاڭدا قوعام عىلىمنان زاماناۋي ماسەلەلەردى شەشۋ جولدارىن، سونداي-اق بولاشاق قاۋىپ-قاتەرلەردى بولجاي الاتىن ناقتى ۇسىنىستار كۇتۋدە. بۇل مىندەتتەردى جۇزەگە اسىرۋ – جاڭا سايلانعان اكادەميكتەردىڭ باستى جاۋاپكەرشىلىگى، – دەدى اقىلبەك كۇرىشبايەۆ.
دارحان احمەد-زاكي جاڭا اكادەميكتەردى قۇتتىقتاپ، عىلىمدى حالىقارالىق دەڭگەيدە دامىتۋعا ۇلەس قوسقان بارلىق عالىمدارعا العىسىن ءبىلدىردى. سونداي-اق الماتى قالاسى اكىمىنىڭ ورىنباسارى ازامات قالدىبەكوۆ مەگاپوليس اكىمى ەربولات دوسايەۆتىڭ قۇتتىقتاۋىن جەتكىزدى.
جيىن بارىسىندا ق ر پرەزيدەنتى جانىنداعى قازاقستان ۇلتتىق عىلىم اكادەمياسىنىڭ جاڭا سەگىز تولىق مۇشەسى تانىستىرىلدى. ولاردىڭ قاتارىندا مەديسينا سالاسىنان يۋريي پيا مەن ديليارا قايداروۆا، تاريحتان جاكەن تايماعامبەتوۆ، فيزيكا مەن ماتەماتيكادان ايدارحان قالتايەۆ، يادرولىق عىلىمنان ەرلان باتىربەكوۆ، تەحنيكالىق عىلىمداردان باعدات تەلتايەۆ، حيميادان جۇماباي باكەنوۆ، ۆەتەريناريادان مۇحيت ورىنبايەۆ بار. ولارعا ارنايى ديپلومدار تابىستالدى.
اكادەميكتەر ءوز سوزدەرىندە عىلىم سالاسىنداعى جەتىستىكتەرى مەن الداعى جوسپارلارىمەن ءبولىستى. ارحەولوگ، تاريح عىلىمدارىنىڭ دوكتورى جاكەن تايماعامبەتوۆ ءوزىنىڭ ءومىر جولىن بايانداپ، عىلىمدى دامىتۋ ءۇشىن ورتاق كۇش-جىگەردىڭ ماڭىزدىلىعىن اتاپ ءوتتى.
ال ديليارا قايداروۆا ەل بويىنشا وكپە قاتەرلى ىسىگىن ەرتە انىقتاۋ سكرينينگىن كۇشەيتۋ جوسپارىن ورتاعا سالىپ، بۇل باعدارلامانىڭ پاسيەنتتەرگە ۋاقىتىلى كومەك كورسەتۋگە مۇمكىندىك بەرەتىنىن ايتتى.
ءىس-شارا كونسەرتتىك باعدارلامامەن جالعاسىپ، قازاق ەستراداسىنىڭ تانىمال انشىلەرى مەن "الاتاۋ" ءداستۇرلى ونەر تەاترىنىڭ ارتىستەرى ونەر كورسەتتى. جيىن بارىسىندا اكادەميا قىزمەتى اياسىندا جۇزەگە اسقان عىلىمي جەتىستىكتەر كورمەسى دە ۇيىمداستىرىلدى.
قازاقستان ۇلتتىق عىلىم اكادەمياسى الداعى ۋاقىتتا دا عىلىمدى دامىتۋعا باعىتتالعان ناقتى مىندەتتەردى ىسكە اسىرۋدى جالعاستىرادى. بيىل العاشقى رەت جاستار كەڭەسى قۇرىلىپ، جاس عالىمداردىڭ تۇڭعىش كونگرەسى ءوتتى. حالىقارالىق ىنتىماقتاستىق اياسىندا الەمنىڭ جەتەكشى عىلىمي ۇيىمدارىمەن 27 مەموراندۋمعا قول قويىلىپ، بىرلەسكەن ورتالىقتار اشىلدى.