الماتىدا باستى جاڭا جىلدىق شىرشا شامى جاعىلدى
الماتىدا ءبىر مەزەتتە 80 جاڭا جىلدىق شىرشانىڭ شامى جاعىلىپ، بۇل مەرەكەلىك ماۋسىمنىڭ سيمۆولدىق باستالۋىن كورسەتتى، دەپ حابارلايدى aqshamnews.kz.
اباي الاڭىندا الماتىنىڭ باستى جاڭا جىلدىق شىرشانىڭ شامىن جاعۋ ءراسىمى ءوتتى. ونىڭ بيىكتىگى 25 مەتر. بيىل مەگاپوليس شىرشاسى العاش رەت كلاسسيكالىق ستيلدە جاسالىپ، قاڭقالى ەمەس، تابيعي ءدىڭدى بولدى. شىرشانى بەزەندىرۋ ءۇشىن التى مەتر گيرلياندا، ءتۇرلى-تۇستى شارلار مەن جاڭا جىلدىق ويىنشىقتار قولدانىلعان.
راسىمگە اۋا رايى ەرتەگىدەي ەرەكشە اتموسفەرا سىيلادى: جاڭا جىلدىق ارۋدىڭ اينالاسىن سيقىرلى قار قورشاپ تۇردى، ال مامىقتاي اپپاق قار ۇلپالارى مەگاپوليستىڭ باستى شىرشاسىن بەزەندىرىپ تۇردى.
8 مىڭنان استام الماتىلىق پەن مەگاپوليس قوناقتارى قازاقستاندىق ەسترادا جۇلدىزدارىنىڭ قاتىسۋىمەن وتكەن كەرەمەت شوۋدى تاماشالادى.
«مەن جاس ورىنداۋشىلاردى قولداپ، قۇتتىقتاۋ ءۇشىن كەلدىم. شىرشا وتە ادەمى، ءبارى تاماشا ۇيىمداستىرىلعان. كونسەرت تە كەرەمەت ءوتتى، ال قارلى اۋا رايى ناعىز جاڭاجىلدىق كوڭىل-كۇي سىيلادى»، – دەدى مەگاپوليس تۇرعىنى سەرگەي دميترييەۆيچ.
كونسەرتتىك باعدارلامانى «BS band» ۇرمەلى وركەسترى اشىپ، جاڭاجىلدىق اۋەندەردەن پوپۋرري ورىندادى. روزا رىمبايەۆانىڭ ساحناعا شىعۋى ەرەكشە مەرەكەلىك كوڭىل-كۇي سىيلادى. حالىق ءارتىسى «سنەگ يدەت» جانە «جۇلدىزدى جاڭا جىل» اندەرىن ورىنداپ، كەشتى جىلۋلىق پەن جاعىمدى ەموسياعا تولتىردى.
بۇگىن الماتىلىقتار مەن قالا قوناقتارىنا جاڭاجىلدىق كوڭىل-كۇيدى نازىم ءابىلدينا، ءمادي رىمبايەۆ، دينارا جانە بالجان بيداش سىيلادى. اسىرەسە جاستار «ALPHA» توبى، Dakelot، «ASTRA» توبى، ماليكا YES جانە Adil ونەرىن اسىعا كۇتتى.
«مەن جاڭا جىلدى قاتتى جاقسى كورەمىن. مۇنداي شارالار باقىت سىيلايدى. مۇنداي كەرەمەت مەرەكەنى ۇيىمداستىرعان اكىمدىككە العىسىم شەكسىز. جاۋعان قار دا ەرەكشە اتموسفەرا سىيلاپ، ءبارى وتە ەرتەگىدەي بولدى»، – دەدى الماتى تۇرعىنى.
Turar-دىڭ «جاڭا جىل» انىمەن قالاداعى العاشقى جاڭاجىلدىق كونسەرت اياقتالىپ، كورەرمەندەرگە مەرەكە الدىنداعى كەرەمەت كوڭىل-كۇي سىيلادى.
ەرتەگىدەگىدەي اتموسفەرانى كۇيمەدەگى كۇلبيكە، ءزىمبىر ادام، بۇعىلار جانە باسقا دا كەيىپكەرلەر بەينەلەنگەن كوركەم بەزەندىرۋ ەلەمەنتتەرى، جارقىراعان فوتوايماقتار مەن جارىق ينستاللياسيالارى تولىقتىردى.
ايتا كەتەيىك، قالاداعى بارلىق اۋداندا شىرشا جاعۋ راسىمدەرى كونسەرتتەر مەن ءارتۇرلى شارالارمەن بىرگە ۇيىمداستىرىلىپ، تۇرعىندار مەن قوناقتارعا مەرەكەلىك كوڭىل-كۇي سىيلادى.
سونداي-اق بۇگىن اباي الاڭىندا باستى جاڭا جىلدىق جارمەڭكە اشىلدى. ول 2025 جىلدىڭ 5 قاڭتارىنا دەيىن جۇمىس ىستەپ، تۇرعىندار مەن قوناقتارعا كادەسىيلار، قولونەر شەبەرلەرىنىڭ بۇيىمدارى مەن مەرەكەلىك اشەكەيلەر ۇسىنادى.