مەملەكەت باسشىسى قاسىم-جومارت توقايەۆ قازاقستان حالقى اسسامبلەياسىنىڭ «بىرلىك. جاسامپازدىق. ورلەۋ» اتتى ءحححىىى سەسسياسىنىڭ وتىرىسىندا ەلدەگى سۋ تاسقىنى جاعدايىن قوزعاپ، مەملەكەت تاراپىنان پارمەندى شارالار قابىلانۋى ءتيىس ەكەنىن ايتتى، دەپ حابارلايدى Almaty-akshamy.kz.
«اپاتتارعا قارسى كۇرەستىڭ ءتيىمدى جۇيەسىن قۇرۋدى كوزدەيتىن كۇردەلى شارۋا شەشىمىن تابۋى كەرەك. سوندىقتان تابيعات اپاتتارىمەن كۇرەسەتىن پارمەندى شارالار قابىلداۋ ءۇشىن مەملەكەت پەن عىلىمنىڭ ىقپالداستىعىن ءىس جۇزىندە قايتادان ءتۇزۋ قاجەت. مەنىڭ تاپسىرماممەن تارازداعى قازاق گيدرومەليوراسيا-قۇرىلىس ينستيتۋتى قايتا قۇرىلادى. سونداي-اق الماتىداعى سەيسمولوگيا ينستيتۋتىنىڭ الەۋەتى كۇشەيەدى. كليمات وزگەرىستەرىن زەرتتەپ، تەجەۋگە ايرىقشا نازار اۋدارىلادى. سۋ شارۋاشىلىعى سالاسىن باسقارۋ جۇيەسى، ونىڭ ىشىندە «قازسۋشار»، «نۇرا توپتىق سۋ قۇبىرى» سياقتى كومپانيالار دا تۇگەل قايتا قۇرىلادى»، - دەدى پرەزيدەنت.
ايتا كەتسەك، قازاقستانداعى بوگەتتەر مەن بوگەندەردىڭ بارلىعى دەرلىك وتكەن عاسىردىڭ 50-70 جىلدارى سالىنعان. زامان تالابىنا ساي سۋ قويمالارى تاپشى بولعاندىقتان، بيىلعى تاسقىننىڭ زاردابى ءتىپتى اۋىر بولدى. سوندىقتان قازاقستاننىڭ 11 ايماعىندا جاڭادان 20 بوگەن سالىنادى، تاعى 15-ىنە كۇردەلى جوندەۋ جۇرگىزىلەدى. سوندا 134 ەلدى مەكەندى سۋ باسۋ قاتەرى ەداۋىر ازايادى.
مەملەكەت باسشىسى سۋ رەسۋرستارىن باسقارۋ جۇيەسىن دامىتۋ تۇجىرىمداماسىنا تاسقىننىڭ الدىن الۋ جانە ونىڭ سالدارىن ازايتۋ شارالارى قوسىلاتىنىن مالىمدەدى. بۇل شارالار حالىقارالىق تاجىريبەنى ەسكەرە وتىرىپ ازىرلەنەدى.
«توتەنشە جاعدايلار مينيسترلىگىنىڭ تەحنيكالىق بازاسىن جاڭارتامىز. ونىڭ ارنايى تەحنيكاسىنىڭ، تىكۇشاقتارى مەن ۇشاقتارىنىڭ سانىن كوبەيتەمىز. ۇلتتىق گيدروگەولوگيا قىزمەتى قايتا قۇرىلادى. بۇل قىزمەت جەر استى سۋ رەسۋرستارىن بارلاۋ جانە قورعاۋ جۇمىسىمەن اينالىسادى. قورشاعان ورتانىڭ جاي-كۇيىنە ءبارىمىز جاۋاپتىمىز، مۇنى ەستەن شىعارماۋ كەرەك. قوعامدا ەكولوگيا مادەنيەتىن قالىپتاستىرىپ، تابيعاتتى ايالاۋ قاعيداسىن دارىپتەگەن ءجون. مەنىڭ باستاماممەن ەلىمىزدە «تازا قازاقستان» جالپىۇلتتىق ناۋقانى ءوتىپ جاتىر. مۇنداي شارالار سۋ تاسقىنى بولعان ايماقتاردا دا ۇيىمداستىرىلادى. ەسكەرتەمىن، بۇل – ەشقانداي دا ءبىر رەتتىك ءىس-شارا ەمەس. بارلىق وڭىردە اۋماقتاردى كوگالداندىرۋعا جانە تازالاۋعا كوپ كوڭىل ءبولۋ كەرەك. اركىم ورتاق ىسكە ۇلەس قوساتىن بولسا، ەلىمىز كوركەيە تۇسەدى»، - دەپ ءتۇسىندىردى قاسىم-جومارت كەمەل ۇلى.
ەل پرەزيدەنتى قوعام مۇلكىنە زالال كەلتىرەتىن ادامدار زاڭمەن جاۋاپقا تارتىلاتىنىن ەسكە سالدى.
«اكىمدەر ۇكىمەتپەن بىرلەسىپ جەرگىلىكتى جولداردى جوندەۋگە كىرىسۋى قاجەت. بۇل جۇمىستار اكىمدەردىڭ قىزمەتىن باعالايتىن نەگىزگى ينديكاتورلار تىزىمىنە ەنگىزىلەدى»، - دەپ قوستى مەملەكەت باسشىسى.