قازاقستان حالقى اسسامبلەياسىنىڭ ءحححىىى سەسسياسىندا سويلەگەن سوزىندە قاسىم-جومارت توقايەۆ اسسامبلەيانىڭ ينستيتۋسيونالدىق الەۋەتىن نىعايتۋ قاجەت ەكەنىن، ونىڭ مەملەكەتتىك ورگاندارمەن، پارلامەنتپەن جانە ماسليحاتتارمەن قارىم-قاتىناسىن جاقسارتا ءتۇسۋ كەرەك ەكەنىن ايتتى، دەپ حابارلايدى Almaty-akshamy.kz.
«اسسامبلەيا بارلىق دەڭگەيدەگى مەكەمەلەرمەن ءتۇرلى باعىتتا سەرىكتەستىك ورناتىپ، باسقالارعا ۇلگى بولۋعا ءتيىس. جەرگىلىكتى اتقارۋشى ورگاندارمەن جانە ماسليحاتتارمەن جۇمىس جۇرگىزۋ ءۇشىن ءتيىمدى تاسىلدەر تابۋعا باسا ءمان بەرگەن ءجون. اكىمدەر كۇندەلىكتى تۋىندايتىن كوپتەگەن ماسەلەمەن اينالىسادى. ولاردىڭ جۇمىسى وتە كوپ، بۇل – تۇسىنىكتى جاعداي. ءبىراق ەل بىرلىگىن نىعايتۋ – ايرىقشا ماڭىزدى مىندەتتىڭ ءبىرى. ونى ەشقاشان نازاردان تىس قالدىرماۋ كەرەك»، دەدى پرەزيدەنت.
مەملەكەت باسشىسىنىڭ ايتۋىنشا، سوڭعى جىلدارى اسسامبلەيانىڭ قىزمەتى ايتارلىقتاي وزگەرىپ، قوعامداعى اسا ماڭىزدى ينستيتۋتقا جانە ەتنومادەني بىرلەستىكتەردىڭ باس شتابىنا اينالدى.
«مەنىڭ تاپسىرماممەن ايماق باسشىلارى كەمىندە ەكى ايدا ءبىر رەت اسسامبلەيا وكىلدەرىمەن بىرگە ەتنوسارالىق احۋالعا قاتىستى جينالىس وتكىزەدى. اسسامبلەيانىڭ نەگىزگى ءىس-شارالارىنا وبلىس جانە رەسپۋبليكالىق ماڭىزى بار قالا اكىمدەرى تىكەلەي وزدەرى قاتىسۋعا ءتيىس. مەن مۇنى ورىنباسارعا ىسىرا سالۋعا بولمايتىنىن ناقتى ەسكەرتتىم. وزگەلەردىڭ، اسىرەسە، پارلامەنتتىڭ جانە بارلىق دەڭگەيدەگى ءماسليحات دەپۋتاتتارىنىڭ ءدال وسىلاي جاساعانى ابزال»، دەدى قاسىم-جومارت توقايەۆ.
سونداي اق پرەزيدەنت اسسامبلەيا مەملەكەتتىك شەشىم قابىلداۋ ۇدەرىسىنە جانە رەفورمالاردى ىلگەرىلەتۋ ىسىنە بەلسەنە قاتىسۋى كەرەك ەكەنىن ايتتى.
«سوندىقتان ونىڭ عىلىمي-ساراپتامالىق الەۋەتىن دامىتۋ قاجەت. ەتنو-الەۋمەتتىك شيەلەنىس وشاقتارىن انىقتاۋعا جانە ونداي وقيعالاردىڭ الدىن الۋعا باسا ءمان بەرىلۋگە ءتيىس. الماتى، جامبىل جانە تۇركىستان وبلىستارىنىڭ ماماندارى ەتنومەدياسياعا قاتىستى جۇمىستى قولعا الدى. ونىڭ اۋقىمىن كەڭەيتىپ، بۇل تاجىريبەنى اسسامبلەيانىڭ بارلىق ۇيىمدارىنا تاراتۋ قاجەت»، دەدى مەملەكەت باسشىسى.
پرەزيدەنتتىڭ ايتۋىنشا، اسسامبلەيانى الەۋمەتتىك تۇتاستىق پەن وتانشىلدىقتى دارىپتەيتىن ينستيتۋت رەتىندە نىعايتۋ كەرەك. ەڭ الدىمەن، اقساقالدار كەڭەسى جانە انالار كەڭەسى سياقتى ءتيىمدى قۇرىلىمداردى دامىتقان ءلازىم. مينيسترلىكتەر جانە اكىمدىكتەر ولاردىڭ قىزمەتىنە قولداۋ كورسەتۋى قاجەت. ارنايى گرانتتار ءبولىپ، مەملەكەتتىك الەۋمەتتىك تاپسىرىستار بەرۋى كەرەك.
«جاستار اسسامبلەيا قىزمەتىنە تىڭ سەرپىن اكەلەدى. سوندىقتان اسسامبلەيا قۇرىلىمدارى مەن ەتنومادەني بىرلەستىك باسشىلارىنىڭ ءبىر ورىنباسارىن جاستاردان تاعايىنداۋدى ۇسىنامىن. ورتالىق جانە جەرگىلىكتى ورگاندار اسسامبلەيانىڭ جاستارعا، اسىرەسە، ۆولونتەرلەرگە قاتىستى جوبالارىنا جان-جاقتى قولداۋ كورسەتۋى كەرەك. مۇنداي جوبالاردىڭ ءتىزىمىن جاساعان ءجون»، دەدى مەملەكەت باسشىسى.