قازاقستان ۇلتتىق بانكى تەلەفون-الاياقتارى بەلسەندىلىك كورسەتە باستاعانى جايىندا ەسكەرتەدى، - دەپ حابارلايدى aqshamnews.kz.
"قاسكويلەر ءوزىن كوممۋنالدىق قىزمەتتىڭ نەمەسە ۇيالى بايلانىس وپەراتورىنىڭ قىزمەتكەرى رەتىندە تانىستىرادى. ازاماتتارعا قوڭىراۋ شالىپ، ءموبيلدى تەلەفونداعى SIM-كارتانىڭ قولدانۋ مەرزىمى نەمەسە كوممۋنالدىق ەسەپتەۋىش قۇرالدىڭ پايدالانۋ مەرزىمى اياقتالعانىن حابارلايدى. تەلەفونمەن اڭگىمە كەزىندە ازاماتتارعا ولاردىڭ قىزمەتىن ۇزارتۋعا نەمەسە ەلەكتروندىق كەزەككە تۇرۋعا بولاتىنىن ايتادى.
ءارى قاراي الاياقتار ۇيالى تەلەفونعا كەلگەن حابارلامانى وزىنە جىبەرۋدى، ءقاۋىپتى سىلتەمەگە ءوتىپ قوسىمشانى جۇكتەۋدى نەمەسە مەسسەندجەردەگى جاڭا فۋنكسيالاردى ىسكە قوسۋدى، يا بولماسا دەربەس دەرەكتەرىن حابارلاۋدى سۇرايدى. كەيىن تەلەفونعا قوسىلىپ العان سوڭ قاسكويلەر ازاماتتىڭ قاراجاتىن ۇرلاپ، SIM-كارتانىڭ ۆيرتۋالدى كوشىرمەسىن قوسىپ الادى"، - دەلىنگەن حابارلامادا.
شوتتاعى اقشالاردى قولدى قىلعاننان كەيىن الاياقتار الدانعان ازاماتتارمەن قايتا بايلانىسىپ، وزدەرىن ۇلتتىق بانكتىڭ قىزمەتكەرى رەتىندە تانىستىرادى. ءسويتىپ ەكىنشى دەڭگەيلى بانكتەردىڭ ءموبيلدى قوسىمشالارىن ورناتىپ، اقشالاي نەمەسە تاۋارلاي كرەديتتەر رەسىمدەيدى. قاسكويلەر ءوز ءىسىنىڭ زاڭدىلىعىن راستاۋ ءۇشىن ۇلتتىق بانك قىزمەتكەرىنىڭ قولدان جاسالعان قىزمەتتىك كۋالىگىن، ۇلتتىق بانكتىڭ جالعان قۇجاتتارىن، اقشا قۇرالدارىن ساقتاندىرۋ نەمەسە بانكتىك اۋدارىمدار جاساۋ ءۇشىن حاتتار مەن رەكۆيزيتتەر ۇسىنادى.
"قازاقستان ۇلتتىق بانكى ازاماتتاردى قىراعى بولۋعا جانە كۇدىك تۋعىزعان قوڭىراۋلارعا سەنبەۋگە، كۇماندى سىلتەمەلەرگە وتپەۋگە، سونداي-اق بەيتانىس ادامداردىڭ نۇسقاۋىمەن HopToDesk، RustDesk، RUDesktop، AnyDesk، TeamViewer سياقتى قاشىقتان باسقاراتىن باسقا دا قوسىمشالاردى ورناتپاۋعا شاقىرادى.
ءۇشىنشى تۇلعالار تاراپىنان ورىندالاتىن الاياقتىق ارەكەتتەرگە ۇرىنىپ قالماس ءۇشىن ۇلتتىق بانك مەملەكەتتىك ورگاندار مەن ۇلتتىق بانكتىڭ قىزمەتكەرى بولىپ قوڭىراۋ شالعان ادامدارمەن اراداعى بايلانىستى ۇزۋگە كەڭەس بەرەدى.
ۇلتتىق بانكتىڭ قىزمەتكەرلەرى اۋديو جانە بەينەقوڭىراۋ جاسامايتىنىن، جەكە تۇلعالاردىڭ شوتىنا قىزمەت كورسەتپەيتىنىن، اقشا قۇرالدارىن ساقتاندىرۋمەن اينالىسپايتىنىن، سونداي-اق حالىقپەن اقشالاي ەسەپ ايىرىسپايتىنىن قوسىمشا حابارلايمىز".