ۇلتتىق بانك بازالىق ستاۆكانى 14%-كە كوتەرۋ سەبەبىن ءتۇسىندىردى.
اتالمىش قارجى ينستيتۋتىنىڭ ءتوراعاسى عالىمجان ءپىرماتوۆتىڭ ايتۋىنشا، مۇنداي شەشىم ينفلياسيانىڭ شارىقتاۋىنا توسقاۋىل قويۋ جولىنداعى قاجەتتى شارا رەتىندە قابىلدانعان. ونىڭ سوزىنشە، الەمدەگى گەوساياسي جاعدايعا بايلانىستى ينفلياسيا ايتارلىقتاي وسكەن. سىرتقى نارىقتارداعى قۇبىلمالىق ءالى كۇنگە دەيىن ساقتالىپ وتىر، دەپ حابارلايدى Almaty-akshamy.kz Qazaqtv.com سايتىنا سىلتەمە جاساپ.
باعانىڭ ءوسۋى بار سالالاردا بايقالادى. بۇل جاعدايدا جىلدىق ينفلياسيا 12 پايىزعا دەيىن ءوستى. وسى جاعداي تۇراقتالمايىنشا، بازالىق مولشەرلەمەنى تومەندەتۋ كۇن تارتىبىندە تۇرعان جوق دەدى، عالىمجان ءپىرماتوۆ. ول ەكىنشى توقساندا ينفلياسيا ءالى دە وسەتىنى بولجانعانىن جەتكىزدى.
«وسىعان بايلانىستى ينفلياسياعا قارسى اقشا-كرەديت ساياساتىنىڭ ءرولى قازىرگى كەزدە تۇتىنۋشىلاردىڭ قاراجات جيناقتاۋ ارەكەتىن قولداۋ ءۇشىن ماڭىزدى. اتالعان شارالاردىڭ كومەگىمەن ءبىز سۇرانىس پەن ۇسىنىستىڭ تەڭگەرىمدى بولۋىنا جانە ەكى تاڭبالى كورسەتكىشكە جەتكەن ينفلياسيانىڭ رەتسىز وسپەۋىنە ىقپال ەتە الامىز. سوندىقتان ءبىز ءۇشىن بازالىق مولشەرلەمەنى كوتەرۋ تۋرالى شەشىم، ءبىرىنشى كەزەكتە، ينفلياسيانىڭ ءوسۋ ۇردىسىنە جول بەرمەۋ جولىنداعى قاجەتتى شارا»، - دەيدى ۇلتتىق بانك ءتوراعاسى.