سەبەبى كۇننىڭ جىلىنۋىنا بايلانىستى تاۋدا قار كوشكىنى ءقاۋپى ساقتالادى.
وسىعان وراي قۇتقارۋشىلار ەسكەرتۋ جاسادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ۇلكەن جانە كىشى الماتى وزەندەرىنىڭ باسسەيندەرىندە جاۋىن-شاشىننىڭ كوپ مولشەردە تۇسۋىنە جانە قار جامىلعىسىنىڭ تۇراقسىز جاعدايىنا بايلانىستى 28-29 ءساۋىر ارالىعىندا قار كوشكىنى ءقاۋپى ساقتالادى»، – دەپ حابارلادى قالالىق توتەنشە جاعدايلار دەپارتامەنتىنەن.
قۇتقارۋشىلار قالا تۇرعىندارى مەن قوناقتارىنان تاۋعا ساياحاتتاۋدى كەيىنگە شەگەرە تۇرۋدى سۇرايدى.
ەسكە سالايىق، 13 ءساۋىر كۇنى مولودەجنىي شىڭىندا كوشكىن ءجۇرىپ، ەكى ادام قار استىندا قالدى. كەيىن قۇتقارۋشىلار قاردىڭ استىندا قالعان ادامداردىڭ بىرەۋىن امان-ەسەن شىعارىپ الدى. سول كۇنى كەشكە قاراي قار استىنان ەكىنشى ءتۋريستىڭ دەنەسى تابىلدى.
الماتى قالالىق توتەنشە جاعدايلار دەپارتامەنتىنىڭ مالىمەتىنشە، قار كوشكىنىنىڭ استىندا قالعان ەكى ادام - فرانسيا ەلىنىڭ ازاماتتارى.