كوبىمىز "قوبىز" دەسە بىردەن قورقىتتىڭ قىل-قوبىزىن ەلەستەتەمىز. ونىڭ جاتتاندى ءۇنى ميىمىزعا سيگنال بەرىپ، قۇددى ءبىر ەسكى داۋىرگە جەتەلەگەندەي كۇي ءسىيلايدىۇ الايدا بۇل اسپاپتىڭ ءبىز ويلاعاننان دا مۇمكىنشىلىگى جوعارى ەكەن. گۇلنۇر ەسىمدى قاراعاندىلىق ارۋ "پريما-قوبىز" اتتى اسپاپپەن زاماناۋي باعىتتاعى شىعارمالاردى ورىنداپ، كوپتىڭ كوڭىلىنەن ورىن تەپتى. ۇلتتىق اسپاپتىڭ ۇنىنە جاڭا لەپ سىيلاعان جاس مۋزىكانت اqshamnews.kz تىلشىسىنە سۇحبات بەردى.
سۋرەت: كەيىپكەردىڭ جەكە ارحيۆىنەن
مۋزىكا الەمىنە باسقان العاشقى قادام
گۇلنۇر اسىلمۇرات ونەرگە كىشكەنتايىنان جاقىن وسكەن. ءقازىر ول تاتتىمبەت اتىنداعى قاراعاندى ونەر كوللەدجىندە "قوبىز- پريما" ماماندىعى بويىنشا ءبىلىم الىپ جاتىر. وقۋىمەن قاتار الەۋمەتتىك جەلىدە وسى اسپاپپەن زاماناۋي تانىمال اندەردى ورىنداپ، كونتەنت تە جۇرگىزەدى.
"العاشىندا مەن "پريما-قوبىز" دەگەن اسپاپتىڭ بار ەكەنىن بىلمەگەن ەدىم. 1-سىنىپتان باستاپ بىرنەشە جىل دومبىرا ۇيىرمەسىنە باردىم. كەيىن ءان ايتۋعا دەگەن قىزىعۋشىلىعىم باسىم بولىپ، مۋزىكالىق مەكتەپتىڭ ءداستۇرلى ءان بولىمىنە اۋىستىم. ول جەردە بەس جىل ءبىلىم الدىم. وسى ۋاقىت ارالىعىندا "سارىارقا اۋەندەرى" اتتى بالالار فولكلورلىق انسامبلىندە ءانشى بولىپ ونەر كورسەتتىم"، – دەيدى ول.
ءداستۇرلى انمەن قاتار قوبىزعا دەگەن قىزىعۋشىلىعى ويانىپ، ءتىپتى جەتىگەن اسپابىن دا مەڭگەرىپ العان ەكەن.
"ۇستازىمنىڭ ايتۋىنشا، مەن قوبىز اسپابىنا كەش كەلگەنمىن. سەبەبى بۇل اسپاپ وتە كۇردەلى. ونى 8-9 جاستان باستاپ ۇيرەنگەن دۇرىس. ال مەن قوبىزدى 13 جاسىمدا عانا قولعا الدىم. سوعان قاراماستان، ءداستۇرلى ءاندى 5 جىل، قوبىزدى 4 جىل وقىپ، ەكى باعىت بويىنشا دا اتتەستات الدىم. وقۋشى كەزىمدە ءتۇرلى بايقاۋلارعا قاتىسىپ، ءداستۇرلى ءان، پريما-قوبىز جانە جەتىگەن نوميناسيالارىندا بىرنەشە رەت I جانە II ورىندارعا يە بولىپ، لاۋرەات اتاندىم"، – دەيدى گۇلنۇر.
"بۇل قوبىز ەمەس، سكريپكا عوي!"
گۇلنۇر كوبى پريما-قوبىز اسپابى جايلى بىلە بەرمەيتىنىن ايتتى. جەلىدەگى ۆيدەولارىنا جۇرت ءتىپتى ءتۇرلى پىكىرلەر قالدىرىپ كەتەدى ەكەن.
"كوپ ادام قوبىز دەسە بىردەن قورقىتتىڭ قوبىزى مەن كونە ءداۋىردىڭ قىل-قوبىزىن ەلەستەتەدى. ءبىراق پريما-قوبىز جايلى ءالى دە كوپشىلىك بىلە بەرمەيدى. كەيدە ۆيدەولارىما "بۇل قوبىز ەمەس، سكريپكا عوي" دەگەن پىكىرلەر جازىپ جاتادى. الايدا وسى ارقىلى پريما-قوبىزدى تانىمايتىندار دا قىزىعىپ جاتىر"، – دەيدى گۇلنۇر.
ول بالا كەزىنەن زاماناۋي اندەردى مۋزىكالىق تۇيسىك ارقىلى ۇيرەنىپ، شەتەلدىك حيتتەر مەن قازاق اندەرىن قوبىزعا سالىپ، ورىنداۋدى ادەتكە اينالدىرعان.
"تانىمال جۇلدىزدارمەن كوللابوراسيالار جاساعىم كەلەدى"
الەۋمەتتىك جەلىدە پىكىر جازىپ جاتقان حالىقتىڭ ءاربىر ويى گۇلنۇر ءۇشىن ماڭىزدى. ول قولداۋ بىلدىرۋشىلەردىڭ پىكىرىنە ءاردايىم قۋاناتىنىن ايتتى.
"جەلىدە پىكىر قالدىرعان ادامداردىڭ جىلى لەبىزدەرى مەنى قاتتى قۋانتادى. قانداي پىكىر بولماسىن مەن ءۇشىن ءبارى ۇلكەن موتيۆاسيا. ونەرىم ارقىلى ۇلتتىق اسپاپتى وزگەشە قىرىنان تانىستىرىپ ءجۇرمىن دەگەن وي وزىمە شابىت بەرەدى"، – دەيدى ول.
سونداي-اق، جاس مۋزىكانت الداعى ۋاقىتتا كوپتەگەن مۋزىكالىق جوبادا ونەر كورسەتىپ، تانىمال تۇلعالارمەن دۋەس جاساعىسى كەلەتىنىن جاسىرمادى.
"ءقازىر كوللەدجدە سوڭعى كۋرستا وقىپ جاتىرمىن. كەلەشەكتە الماتى نەمەسە استاناداعى جوعارى وقۋ ورنىندا كاسىبي ءبىلىمىمدى جەتىلدىرگىم كەلەدى. ماقساتىم – ءوز ءىسىنىڭ شەبەرى، مىقتى قوبىزشى بولۋ. ارمانىم – بەدەلدى وركەسترلەردە جۇمىس ىستەۋ، ۇلكەن ساحنالاردا ونەر كورسەتۋ. سونىمەن قاتار، ديماش قۇدايبەرگەن، قازىبەك قۇرايىش، "يليگاي" توبى، سادراددين سياقتى تالانتتى مۋزىكانتتارمەن ءبىر ساحنادا ونەر كورسەتۋ – مەنىڭ ارمانىم"، – دەيدى قوبىزشى قىز.