ۇلتتىق اسحانا تاڭقالدىردى

فرانسيا استاناسىندا «دوڭگەلەكتى قازاق اس ءۇيى» اتتى جاڭا جوبا باستالدى. ونداعى مەيرامحانادا قازاق اسپازى باسشىلىق ەتەدى. مۇنداعى ماسەلە – جالپى تاماقتا ەمەس، ۇلتتىق تاعامدا.

كولىكتەگى ءاسۇي پايدا بولعان سوڭ، شاتييون-مونرۋج ستانسياسىنا جەرگىلىكتى قازاقتار اعىلا باستادى. بۇعان باستاماشىلار تاڭ-تاماشا بولدى. سەبەبى ولار نەگىزى فرانسۋزدارعا سەنىم ارتىپ كەلگەن ەدى. مازىردەگى سوزدەردى دە سولارعا لايىقتادى. «نوماد»، «دالا»، «جىبەك جولى» اتاۋلارى جۇرت نازارىن اۋدارا ءبىلدى، دەپ حابارلايدى Almaty-akshamy.kz.

«قازاقستاندى تانىتۋ دا ءبىزدىڭ باستاپقى ماقساتىمىز بولاتىن. ءبىراق قانداستارىمىزدىڭ تاراپىنان ۇلكەن قولداۋ بولادى دەپ كۇتكەن جوقپىز. فرانسۋزدار سۇراقتى قارشا بوراتىپ جاتىر. ۋاقىت تاۋىپ، قىسقا دا نۇسقا تۇسىندىرۋگە تىرىسامىز. ارينە، مادەني تۇرعىدا ەلىمىز ءۇشىن بۇل كۇشتى جارناما»، – دەدى «Delices Des Steppes» كومپانياسىنىڭ قوسالقى نەگىزىن سالۋشىسى ءمادينا قۇلمانوۆا.

جوبانى دايىنداۋعا ءبىر جىل ۋاقىت كەتكەن. ىندەتكە بايلانىستى رۇقسات الۋ مەرزىمى ۇزاققا سوزىلعان. ساپالى ەت تابۋ دا قيىن بولعان. جوبا اۆتورلارى ونىمدەردى جارتى جىل بويى زەرتتەگەن. قازىردە اتالعان مەيرامحانا اپتاسىنا 5 كۇن جۇمىس ىستەيدى. ءپاريجدىڭ اينالاسىن ارالاۋ دا ويدا بار كورىنەدى.

جوبا اۆتورلارى الداعى ۋاقىتتا كەلۋشىلەرگە قازى مەن قۇرتتىڭ ءدامىن تاتتىرۋدى جوسپارلاپ وتىر. ال ازىرگە كوپشىلىك قازاق سامساسى مەن ءمانتىسىنىڭ دامىنە ءتانتى بولىپ، قايتا-قايتا كەلۋدە.