ديدار امانتايدىڭ جاڭا كىتابى جارىق كوردى
الماتىدا جازۋشى ديدار امانتايدىڭ ۇلت ۇستازى احمەت بايتۇرسىن ۇلىنىڭ ءتىل مۇراتىن، فيلوسوفيالىق بولمىسىن تالداعان رومان-ەسسەسى جارىق كوردى.
مادەنيەت باسقارماسىنا قاراستى «الماتى قالاسى مۋزەيلەر بىرلەستىگى» كمقك قولداۋىمەن جارىق كورگەن جازۋشى ديدار امانتايدىڭ «احمەت بايتۇرسىن ۇلى: ءتىل مۇراتى، بولمىس فيلوسوفياسى» اتتى كىتابىنىڭ تۇساۋكەسەرى احمەت بايتۇرسىن ۇلى مۋزەي-ۇيىندە ءوتتى.
شاراعا احمەت بايتۇرسىن ۇلى «ءتىل – قۇرال» ءواعزو-نىڭ، الماتى قالاسى مۋزەيلەر بىرلەستىگىنىڭ وكىلدەرى جانە «احمەت بايتۇرسىن ۇلى مۋزەي-ۇيى» قىزمەتكەرلەرى، ستۋدەنتتەر، اباي اتىنداعى مەكتەپتىڭ جاس جەتكىنشەكتەرى قاتىستى.
فيلوسوف جازۋشى، كينودراماتۋرگ د.امانتايدىڭ اتالمىش ەڭبەگى بۇعان دەيىن ا.بايتۇرسىن ۇلى تۋراسىنداعى زەرتتەۋ ەڭبەكتەرىنەن ايرىقشا. كەزەكتى كىتابىندا اۆتور ۇلت ۇستازىنىڭ مۇرالارىنان تۋىندايتىن فيلوسوفيالىق تۇجىرىمداردى العا تارتادى. سونداي-اق ونىڭ اعارتۋشىلىق جانە الەۋمەتتىك تاقىرىپتا جازىلعان ەڭبەكتەرىن تالدايدى.
اۆتوردىڭ بۇل ەڭبەگى احمەتتانۋدا تىڭ كوزقاراستارعا تولى بولۋىمەن ەرەكشەلەنگەن. قازاق ادەبيەتتانۋ عىلىمىنىڭ نەگىزىن قالاۋشى ءارى اعارتۋشىنىڭ تۇلعالىق قابىلەتىنە جاڭا قىرىنان ۇڭىلگەن. جاڭا ەڭبەك ا.بايتۇرسىن ۇلىنىڭ بولمىس فيلوسوفياسىنا ۇڭىلگەن العاشقى ەڭبەك دەۋگە بولادى.
شارادا «احمەت بايتۇرسىن ۇلى مۋزەي-ۇيىنىڭ» جەتەكشىسى رايحان يماحانبەت ديدار امانتايعا اسا باعالى ەڭبەگى ءۇشىن ريزاشىلىعىن ءبىلدىردى.