ۇلت ۇستازىنا ۇكىم شىققان كۇن

وسىدان تۋرا 85 جىل بۇرىن 8 جەلتوقسان كۇنى احمەت بايتۇرسىن ۇلى اتۋ جازاسىنا كەسىلدى.

تاريحي دەرەكتەرگە زەر سالساق، اتىشۋلى "ۇشتىكتىڭ" عۇلاما عالىمدى اتۋ تۋرالى العاشقى شەشىمى 1930 جىلدىڭ 4 ساۋىرىندە شىققان بولاتىن. كەيىن بۇل شەشىم بىرنەشە رەت وزگەرتىلىپ، ءتىپتى احمەت بايتۇرسىنۇلىنا ورىس زيالىلارىنىڭ ءوزى اراشا تۇسەدى. وسىلايشا ول ايداۋ مەن قۋعىننىڭ اراسىندا ادام توزگىسىز جاعدايدا ءومىر سۇرسە دە، 1937 جىلعا دەيىن قازاق مۇددەسىنە قىزمەت ەتۋگە مۇمكىندىك الادى. 1937 جىلى 8 قازاندا سوڭعى رەت تۇتقىندالىپ، 8 جەلتوقساندا اتۋ جازاسىنا كەسىلدى.

بيىل الاش ايبوزىنىڭ تۋعانىنا 150 جىل تولعانى UNESCO كولەمىندە اتاپ ءوتىلدى. سول مەرەيتويدىڭ لوگيكالىق ءتۇيىنى احمەت بايتۇرسىن ۇلىنىڭ اتىلعان كۇنىمەن تۇيىندەلمەكشى.

«ۇلت ۇستازى احمەت بايتۇرسىن ۇلىنىڭ 150 جىلدىعىنىڭ قورىتىندى جيىنى رەتىندە الماتىداعى ۇلتتىق كىتاپحانادا ونىڭ 12 تومدىق شىعارمالار جيناعىنىڭ تۇساۋكەسەرى وتەدى. مۇنداعى ماقسات – ۇلت ۇستازى شىعارمالارىن ناسيحاتتتاپ، الاش ارداقتىسىنىڭ جازىقسىز اتىلعان كۇنىن ەسكە الۋ، رۋحىنا دۇعا باعىشتاۋ. شارانى الماتى قالاسى مۋزەيلەر بىرلەستىگى، ق ر ۇلتتىق كىتاپحاناسى مەن احمەت بايتۇرسىن ۇلى «ءتىل — قۇرال» عىلىمي زەرتتەۋ ورتالىعى» وتكىزەدى - دەيدى احمەت بايتۇرسىن ۇلى مەموريالدى مۋزەي ءۇيىنىڭ ديرەكتورى رايحان يماحانبەت.