«الماتى — ءبىزدىڭ ورتاق ءۇيىمىز» ناۋقانى اياسىندا ۇلت ۇستازى احمەت بايتۇرسىن ۇلىنىڭ مۋزەي-ۇيى اۋلاسىنداعى گۇلزار الاڭقايىنىڭ توپىراعىن قوپسىتىپ، كوشەتتەر وتىرعىزىلدى.
شارا «گۇل ەگىپ، الەمدى نۇرلاندىر» اكسياسى شەڭبەرىندە ءوتتى، - دەپ حابارلايدى Almaty-اkshamy.kz.
كۇنى كەشە، 8 اقپاندا الماتى قالاسىنىڭ اكىمى ەربولات دوسايەۆ «الماتى – ءبىزدىڭ ورتاق ءۇيىمىز» ناۋقانىنىڭ باستالعانىن مالىمدەدى. ناۋقانىنىڭ باستى ماقساتى - قالالىق ينفراقۇرىلىمعا ۇقىپتى قاراۋ قۇندىلىعىن قالىپتاستىرۋ، حالىق اراسىندا جوعارى ازاماتتىق جاۋاپكەرشىلىك پەن ەكولوگيالىق مادەنيەتتى تاربيەلەۋ، جەكە ەكولوگيالىق باستامالاردى قولداۋ مەن ىسكە اسىرۋعا جاعداي جاساۋ. ول ءبىر ايعا سوزىلادى.
بۇگىن وسىنداي كەرەمەت ناۋقاننىڭ اياسىندا ۇلت ۇستازى احمەت بايتۇرسىن ۇلىنىڭ مۋزەي-ۇيى اۋلاسىنداعى گۇلزار الاڭقايىنىڭ توپىراعىن قوپسىتىپ، كوشەتتەر وتىرعىزىلىپ اۋلا تازارتىلدى.
ءىس-شاراعا ەلىمىزدىڭ ەڭبەك سىڭىرگەن قايراتكەرى، اقىن ۇلىقبەك ەسداۋلەت، جۋرناليست قاينار ولجاي، اكتەر بايعالي ەسەنالى، كومپوزيتور، ءانشى قادىرعالي كوبەنتاي، الماتى قالاسى مۋزەيلەر بىرلەستىگىنىڭ باسشىسى ءلاززات ساعىندىقوۆا، ءتىلشى قاراكوز ءسىمادىل، ۇستاز اياتجان احمەتجان، تەلە-جۋرناليست مەيرامبەك تاۋبالدييەۆ، كۇيشى تولعاناي قاسەن، ءانشى ءدىلناز بەردالييەۆا جانە مۋزەي-ۇيىنىڭ قوعامدىق بەلسەندىلەرى، ستۋدەنتتەر مەن وقۋشىلار قاتىستى.
قازاقستاننىڭ ەڭبەك سىڭىرگەن قايراتكەرى، اقىن ۇلىقبەك ەسداۋلەت قالا اكىمدىگىنىڭ «الماتى – ءبىزدىڭ ورتاق ءۇيىمىز» اتتى ناۋقانىن وتكىزۋ باستاماسىن قولدايتىنىن ايتتى. ونىڭ سوزىنشە ناۋرىز ەجەلدەن اينالانى تازارتۋدى باستايتىن ۋاقىت، مەرەكە ەكەنىن اتاپ ءوتتى. الماتى قالاسى مۋزەيلەر بىرلەستىگىنىڭ باسشىسى ءلاززات ساعىندىقوۆا مۇنداي ناۋقان تەك ءبىر ايمەن شەكتەلمەي ودان ءارى جالعاساتىنىن باسا ايتتى.