Almaty-akshamy.kz سايتىندا بۇگىن جارىق كورگەن جاڭالىقتارعا شولۋ – كۇن كەرۋەنى
ۇلت كيىمى ۇلىقتالعان كۇن
14-23 ناۋرىز ارالىعىندا حالىقتىق مەرەكەنى تويلاۋعا ارنالىپ جاريالانعان ناۋرىزناما ونكۇندىگىنىڭ بەسىنشى كۇنى ۇلتتىق كيىمدى ۇلىقتادى. ۇلتتىق كيىمگە ارنالعان بۇل كۇن اتا-بابامىزدى، ۇرپاقتان-ۇرپاققا جالعاسىپ كەلە جاتقان ادەت-عۇرىپتاردى ەسكە الاتىن ەرەكشە كەزەڭگە اينالادى. بۇل – حالىق رۋحىنىڭ شاعىلىسىن بەينەلەيتىن ۇلتتىق ديزايننىڭ كوركەمدىگى مەن قايتالانباس ورنەگىنە تامسانىپ، بۇل ونەردەگى باي مۇرانى زەرتتەپ، ودان شابىت الاتىن كۇن.
سوقىر كەلەشەك
DailyMail باسىلىمىندا جاريالانعان ماقالادا بالالاردىڭ سمارتفونداردى شامادان تىس پايدالانۋىنىڭ سوڭى ولاردىڭ كوزدەرىنىڭ كورمەي قالۋىنا اكەلۋى مۇمكىن ەكەندىگى ايتىلعان. دارىگەرلەردىڭ ايتۋىنشا، سوڭعى 50 جىلدا ۇلىبريتانيادا بالالار اراسىندا الىستان كورمەۋشىلىك ەكى ەسە ءجيى انىقتالاتىن بولعان. 15-تەن 16-عا دەيىنگى جاس ارالىعىندا كوز اۋرۋلارىنىڭ دياگنوزى ءاربىر ءتورتىنشى بالاعا قويىلعان. الىستان كورمەۋ بالالار مەن جاسوسپىرىمدەردە كۇندىزگى جارىق كەزىندە ولاردىڭ الىستاعى زاتتارعا وتە از قاراۋىنان پايدا بولادى. ەسەسىنە، بالالار ول كەزدە كوزدەرىن تەلەفوننان المايدى.
قولىڭدا قامشىڭ ويناسىن!
الماتىدا زاماناۋي قامشىلاردىڭ تۇساۋكەسەرى ءوتتى. ونىڭ ىشىندە بالالارعا ارنالعان «بىلگە» قامشىسى بار. قامشىدا قازاقتىڭ ءان كۇيلەرى، جاڭىلتپاش، ماقال-ماتەلدەرى توپتاستىرىلعان. Smart قامشىعا ەلىمىزگە بەلگىلى ونەر ادامدارىنىڭ اندەرى دە ەنگىزىلگەن.
ايەلدەردى كوپ دەۋشى ەك...
عالىمدار الداعى 10 جىلدا كۇللى الەم بويىنشا دۇنيەگە كەلەتىن قىزدار قاراسى 4،7 ملن-عا ازاياتىنىن العا تارتىپ وتىر. ستاتيستيكالىق دەرەكتەرگە نەگىزدەلىپ ازىرلەنگەن سەنارييلەردىڭ بىرىنە سايكەس 2030 جىلعا قاراي بۇل ەلدەردە 4،7 ميلليون قىز كەم دۇنيەگە كەلەدى. ەكىنشى سەناريي بويىنشا وسى كۇنگى قالىپتاسقان تەندەنسيالار ساقتالسا، بۇل كورسەتكىش 2100 جىلعا قاراي الەم بويىنشا 22 ميلليوننان اسۋى مۇمكىن.
ايىپپۇل ارقالاتاتىن ناسىباي
ءىىم شەگىلمەيتىن تەمەكى ونىمدەرىن زاڭسىز ساتۋ مەن تاراتۋ ءۇشىن جاۋاپكەرشىلىك بارىن ەسكە سالدى.
«قازىرگى ۋاقىتتا «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكسىندە شەگىلمەيتىن تەمەكى ونىمدەرىن، ونىڭ ىشىندە ناسىبايدى اكەلۋگە، وندىرۋگە، ساتۋعا جانە تاراتۋعا تىيىم سالۋ كوزدەلگەن. شەگىلمەيتىن تەمەكى ونىمدەرىن زاڭسىز ساتقانى ءۇشىن 25 اەك نەمەسە 92 مىڭ تەڭگەدەن استام مولشەردە ايىپپۇل كوزدەلگەن»، – دەدى ءىىم رەسمي وكىلى شىڭعىس الەكەشيەۆ.
تاريحى تەرەڭ ناۋرىز
«مەرەكەنى 14 ناۋرىز كۇنى تويلاۋ ءداستۇرى گريگوريان كۇنتىزبەسىنە كوشۋمەن بايلانىستى. بۇرىنىراقتا ءبىزدىڭ حالقىمىز جاڭا جىلدى كوكتەمنىڭ ءبىرىنشى كۇنىندە، ياعني 1 ناۋرىزدا مەرەكەلەيتىن. ءبىراق بۇل كۇن مەن ءتۇننىڭ تەڭەلۋى ەمەس. وندا نەلىكتەن كوكتەمنىڭ ءبىرىنشى كۇنى تويلاندى؟ ناۋرىزدى تويلايتىن حالىقتاردىڭ دۇنيەتانىمى مەن فيلوسوفياسىندا جىل باسى بالانىڭ دۇنيەگە كەلۋىن بەينەلەگەن. سونىمەن، ءۇش ايدا بالا جىگىت بولادى، كەلەسى ءۇشىنشى ماۋسىمدا بۇل ورتا جاستاعى ەر ادام، ال كۇزدە كەمەلدەنگەن اقساقال بولادى. قىستا ول ابدەن قارتايىپ، ومىردەن ءوتىپ، كوكتەمنىڭ ءبىرىنشى كۇنىندە بالا بولىپ قايتا دۇنيەگە كەلەدى. وسىلايشا، ەجەلگى قازاقتار كوكتەمنىڭ العاشقى كۇنىندە ءبىر - ءبىرىن جاڭا جىلدىڭ كەلۋىمەن قۇتتىقتاعان»، - دەدى ءال-فارابي اتىنداعى قازاق ۇلتتىق ۋنيۆەرسيتەتىنىڭ پروفەسسورى تاتتىگۇل قارتايەۆا.
ورازامەن ويناما!
دەنساۋلىق ساقتاۋ ءمينيسترى اقمارال ءالنازاروۆا بالالاردىڭ ورازا ۇستاۋىنا قاتىستى ويىن ءبىلدىردى.
«جالپى العاندا، بالانىڭ اعزاسى تەز وسەدى جانە كۇندەلىكتى كوپ ەنەرگيا جۇمسايدى. سوندىقتان وسى ەنەرگيانى ۋاقىلى تولىقتىرىپ وتىرۋى كەرەك. اتاپ ايتقاندا، ءاربىر اتا-انا بالالارىنىڭ دامۋىنا قاتىستى ماسەلەنى ءتۇسىنۋى كەرەك. بالانىڭ دەنساۋلىعى ءۇشىن ۋاقىتىلى، ساپالى ءارى تەڭگەرىمدى تاماقتانۋى وتە ماڭىزدى دەپ ەسەپتەيمىن. مەنىڭ ويىمشا، 16-17 جاسقا دەيىن، ياعني بارلىق ورگاندارىنىڭ تولىق قالىپتاسۋىنا ءمان بەرۋ كەرەك»، - دەدى مينيستر.