بۇگىن، الماتىداعى ەۋرازيا عىلىمي-زەرتتەۋ ينستيتۋتىندا وتكەن وتىرىستا باۋىرلاس تۇرىك جۇرتىنىڭ ۇلتتىق ءانۇرانى قابىلدانعان تاريحي كۇن اتالىپ ءوتتى.
ءارى، تاريحي جىرعا ارقاۋ بولعان چاناككالە قۇرباندارى ەسكە الىندى دەپ حابارلايدى Almaty-aqshamy.kz.
بۇدان 103 جىل بۇرىن، 1921 جىلى 12 ناۋرىزدا احمەت اكيف ەرسويدىڭ «تاۋەلسىزدىك مارشى» اتتى رۋھتى جىرى تۇركيا رەسپۋبليكاسىنىڭ ۇلتتىق ءانۇرانى بولىپ قابىلدانعان بولاتىن. تۇرىكتىڭ ايگىلى اقىنى ەرسويدىڭ جىرىنا ارقاۋ بولعان چاناككالە وقيعاسى دا وسى تاريحي داتامەن بىرگە باۋىرلاس تۇرىك ەلىندە ەسكە الىپ كەلەدى.
ەۋرازيا عىلىمي-زەرتتەۋ ينستيتۋىندا وتكەن جيىنعا تۇركيا رەسپۋبليكاسىنىڭ الماتىداعى باس كونسۋلى ەۆرەن مۇددەريسوعلۋ قاتىسىپ، ەل تاريحىنداعى ەلەۋلى كۇن مەن تاريحي جىرعا قاتىستى ءسوز سويلەدى. ول «تاۋەلسىزدىك مارشى» تۇرىك حالقىنىڭ ماقتانىشى ەكەنىن، وندا حالقىنىڭ وتكەنى مەن بۇگىنى جانە بولاشاق ارمان-ماقساتى بەينەلەنگەنىن تىلگە تيەك ەتتى.
بۇدان تىس جيىنعا احمەت ياسساۋي ۋنيۆەرسيتەتى قامقورشىلار كەڭەسىنىڭ ءتوراعاسى مۋحيتتين شيمشەك، تۇركسوي جازۋشىلار وداعىنىڭ ءتوراعاسى ۇلىقبەك ەسداۋلەت، ەۋرازيا عىلىمي-زەرتتەۋ ينستيتۋتىنىڭ ديرەكتورى سۋات بەيلۋر، Alatau-Aqparat مەدياحولدينگىنىڭ ديرەكتورى ەرجان قالىمباي ۇلى جانە ءال-فارابي ۋنيۆەرسيتەنىنىڭ شىعىستانۋ فاكۋلتەتى اعا وقىتۋشىسى نۇرات ءىلياس قاتىستى.
اقىن ۇلىقبەك ەسداۋلەت بۇدان ءبىر عاسىردان استام ۋاقىت بۇرىن جازىلعان تاريحي جىردا تۇتاس تۇركى جۇرتىنا ورتاق پوەتيكالىق سارىن مەن بيىك سۋرەتكەرلىك جاتقانىن ايتىپ ءوتتى. ءارى اقىن احمەت اكيف ەرسويدىڭ ءوز داۋىرىندەگى ءاربىر تۇرىك ازاماتىنىڭ كوڭىلىندەگى ايتقىسى كەلگەن ءسوزدى تاپ باسىپ تاپقان اقىندىق دارىنى تۋرالى تەرەڭ تولعانىسىن جەتكىزدى.
شىعىستانۋشى نۇرات ءىلياس چاناككالە وقيعاسىنا قاتىستى تاريحي وقيعالار تۋرالى جانە چاناككالە جەڭىسىنىڭ ورتا ازياداعى تۇركى ەلدەرىنە قالاي اسەر ەتكەنى تۋرالى ءوز پىكىرىمەن ءبولىستى. سونداي-اق، تۇركى ەلدەرى اراسىنداعى قارىم-قاتىناستىڭ وتكەنى مەن بۇگىنىنە قاتىستى جاڭاشا كوزقاراستارىمەن ءبولىستى.