22 تامىزدا ۇكىمەت وتىرىسىندا ق ر ەنەرگەتيكا ۆيسە-مينيسترى جاندوس نۇرماعانبەتوۆ ۇلكەن اۋىلىنداعى اەس قۇرىلىسىنا قاتىستى قوعامدىق تىڭداۋلاردىڭ قورىتىندىسى بويىنشا قانداي شەشىم قابىلداۋعا بولاتىنىن ايتتى، دەپ حابارلايدى Almaty-akshamy.kz Zakon.kz-كە سىلتەمە جاساپ.
جاندوس نۇرماعامبەتوۆ «اتوم ەنەرگياسىن پايدالانۋ تۋرالى» زاڭعا سايكەس، اكىمدىكتىڭ كەلىسىمى نەگىزىندە اتوم ەلەكتر ستانسيالارىن قاي جەردە سالۋ كەرەك ەكەنىن ۇكىمەت ءوزى شەشەتىنىن ايتتى.
«مينيسترلىكتىڭ ۆەدومستۆوارالىق كوميسسياسى ءبىرىنشى ستانسيانى ۇلكەن اۋىلىنىڭ ماڭىنا سالۋ كەرەك ەكەنىن ايتىپ وتىر. ءبىز الماتى وبلىسىنىڭ ءماسليحاتىنا ءوتىنىش بىلدىردىك. ولار اۋىل جۇرتشىلىعى جوبانى قولداسا دەگەن شارتپەن كەلىسىمىن بەردى. قوعامدىق تىڭداۋلارعا تۇرعىندار دا، بەلسەندىلەر دە، قوعامدىق ۇيىمدار دا قاتىسىپ جاتىر. وندا قويىلعان سۇراقتاردىڭ بارلىعىن ءبىز تالدايمىز»، - دەدى ۆيسە-مينيستر.
جاندوس نۇرماعامبەتوۆتىڭ ايتۋىنشا، ستانسيا قۇرىلىسىنىڭ ناقتى ورنى تۋرالى شەشىم قابىلداۋ ءۇشىن الماتى وبلىسى اكىمدىگىنىڭ كەلىسىمى قاجەت.
«بۇگىن اكىمدىك بار نەمەسە جوق دەپ، جاۋابىن ايتادى. وسىدان كەيىن بۇل ستانسيانى سالۋ تۋرالى شەشىم قابىلدانادى. ءبىراق ستانسيا سالىنباي تۇرىپ، تەحنيكالىق-ەكونوميكالىق نەگىزدەمەسى جاسالادى. ءبىز قورشاعان ورتاعا اسەرىن باعالايمىز. بارلىق مۇددەلى تاراپتىڭ پىكىرىن جينايمىز. بۇل جۇمىس ەندى باستالىپ جاتىر»، - دەپ ءتۇسىندىردى سپيكەر.
«تۇرعىندار اەس قۇرىلىسىنا قارسى داۋىس بەرسە نە بولادى؟»،- دەپ ناقتىلادى جۋرناليستەر.
«بۇگىن تۇرعىنداردىڭ كوبى «جوق» دەسە، الماتى وبلىسى ءماسليحاتىنىڭ شەشىمى كۇشىنە ەنبەيدى. بۇل - رۇقسات بولمايدى دەگەن ءسوز. جاڭا ورىن ىزدەيمىز»، - دەپ تۇيىندەدى ءسوزىن جاندوس نۇرماعامبەتوۆ.
بۇعان دەيىن ۇلكەن اۋىلىندا اەس قۇرىلىسىنا قاتىستى قوعامدىق تىڭداۋلار ءوتىپ جاتقانى حابارلانعان ەدى. بۇل ماسەلە قىزۋ پىكىرتالاس تۋدىردى: كەيبىر جەرگىلىكتى بەلسەندىلەر اەس سالۋعا قارسى، ءبىراق اۋىل تۇرعىندارىنىڭ كوبى قۇرىلىستى قولداپ، ونىڭ ەكونوميكالىق پايداسىن ايتىپ جاتىر.