وسى ايدىڭ جارتىسىنان اۋا باستالعان «قاۋىس» امالى مارەسىنە جەتتى. امال بويىنشا، وسى كەزدە جەڭىل ءارى جۇمساق قار جاۋاتىن بولعان. جاڭبىر جاۋدى، ءبىراق قار كورىنىس بەرمەدى. اۋا رايى بىرتىندەپ سۋىي باستادى.
«قاراشا كەلمەي، قار جاۋماس» دەيدى. قار قاراشانىڭ العاشقى كۇندەرىندە ءتۇسىپ، ەرىمەي جاتىپ قالسا، قىس ۇزاق بولادى دەپ بولجاعان. ادامدى، مالدى ىقتىرىپ، بەت قاراتپايتىن سۋىق جەل سوعادى، ونى ەل اراسىندا ىقتىرما جەل دەپ اتايدى. مۇنداي جاعداي الماتىدا بولماعانىمەن، استانادا، ەلىمىزدىڭ شىعىسى مەن سولتۇستىگىندە تولىق دەڭگەيدە كورىنىس بەردى.
«وتكەن تاۋلىكتە استانا توتەنشە جاعدايلار دەپارتامەنتىنىڭ قىزمەتكەرلەرى 28 رەت شاقىرۋعا شىقتى. ولاردىڭ ىشىندە راستالماعان 3 فاكت، 10 ءورت وقيعاسى، 12 اۆاريالىق-قۇتقارۋ جۇمىسى جانە ت.ب.»، دەلىنگەن حاباردا.
«پاۆلوداردا داۋىل كەزىندە 100-گە تارتا اۋىلدا جارىق ءسونىپ قالعان. دەگەنمەن، 60 ەلدىمەكەندە ۇزىلگەن سىمدار قايتا جالعانىپ، توك بەرىلدى دەگەن حابار جەتتى. ازىرشە 40 اۋىل جارىقسىز وتىر»، – دەيدى توتەنشە جاعدايلار قىزمەتى وكىلدەرى.
وتكەندە جاڭا اي تۋدى. جەلتوقسان ايى. كوك جۇزىندە شانشىلىپ تۇردى. قىستىڭ باسىندا ايدىڭ بۇلاي كورىنگەنىن سوڭعى 15–20 جىلدا كورمەپ ەدىك، كومەيدەن ەرىكسىز جىر توگىلدى...
«جەلتوقساننىڭ ايى تۋدى جاپ-جاڭا،
كەلبەتىنەن تاپتى داۋا: جان، سانا.
قىس باسىندا الشىسىنان تۋىپتى،
كوزىمدى الماي تۇرمىن قاراپ تاڭدانا.
اي – قازاقتىڭ ورتاق بولعان سىرىنا،
اي – قازاقتىڭ مۇڭداس بولعان مۇڭىنا...
اي تۋرالى تالاي جازىپ جۇرسەم دە،
العاش رەت ارقاۋ ەتتىم جىرىما.
اي تۋرالى تارتپاپپىن-اۋ مەن قالام،
شاپاعىنان نۇرعا بوككەن بار عالام.
ايعا قاراپ بولاشاعىن بولجاعان،
قازاعىمنىڭ اقىلىنا تاڭقالام.
قازاق دەگەن ادامزاتتىڭ كونبىسى،
ايمەن بىرگە ورىندالعان وڭدى ءىسى.
جەتى تۇندە تۋرا جولدى نۇسقاعان،
اي – قازاقتىڭ بۇلجىمايتىن كومپوسى.
جەلتوقساننىڭ ايى تۋدى وڭىنان،
التىن نۇرىن سەبەلەپ تۇر مولىنان...
قىستىڭ باسى شۋاقتى بوپ باستالدى،
كىم بىلەدى... نە بولارىن سوڭىنان...».
ايدىڭ 23 كۇنى، بۇگىن مەرگەن جۇلدىزدار شوعىرى تورگە وزىپ، توبەگە شىعادى. ول – «قۇس جولىندا» بۇركىت، قالقان، جىلانبوكتەرگەن، سارىشايان، وڭتۇستىك ءتاج، تەلەسكوپ جانە ەشكىمۇيىز شوقجۇلدىزدارىنىڭ ارالىعىندا ورىن تەپكەن. «قۇس جولى» كۇزدىڭ سوڭىندا باۋىرى اعارىپ تۇرادى. مەرگەن جۇلدىزى اياسىندا ومىرگە كەلگەندەردى – مەرەكە مەن دۋماننىڭ ادامى دەپ ايتۋعا بولادى.
23–30 قاراشا ارالىعىندا اۋا رايى قۇبىلمالى بولادى. جاۋىن-شاشىن، ايتارلىقتاي ىزعار ورىن الادى...