ۇلكەن جانە كىشى الماتى سۋ الابىندا قار كوشكىنى ءجۇرۋى مۇمكىن

تاۋلى اۋماقتاردا قاۋىپسىزدىك شارالارىن ساقتاڭىز

الماتى قالاسىنىڭ توتەنشە جاعدايلار دەپارتامەنتى تاۋدا اباي بولۋعا شاقىردى، دەپ حابارلايدى Almaty-akshamy.kz.

«23-25 قاراشا ارالىعىندا جىلىمىقتىڭ اسەرىنەن جانە قار جامىلعىسىنىڭ تۇراقسىز بولۋىنا بايلانىستى ۇلكەن جانە كىشى الماتى سۋ الابىندا قار كوشكىنى ءجۇرۋى مۇمكىن. قيىن جاعدايعا ۇرىنباس ءۇشىن تاۋ بوكتەرىنە شىعۋعا تىيىم سالىنادى»، - دەپ ەسكەرتەدى الماتى قالالىق تجد باسپا ءسوز قىزمەتى.

وسىعان وراي، الماتى قالالىق تجد مەن «قازسەلدەنقورعاۋ» مەملەكەتتىك مەكەمەسى مىناداي ەسكەرتۋ جاريالادى:

- ەگەر تاۋدا بولساڭىز، مۇقيات بولىڭىز جانە اۋا رايىنىڭ وزگەرۋىن قاداعالاڭىز؛

- تاۋ بوكتەرىندە قاردىڭ جىلجۋىن، قاردىڭ تۇيىرشىكتەرىن بايقاساڭىز، وندا تاۋلارعا بارماعانىڭىز ءجون – بۇل قاردىڭ تۇراقسىز كۇيدە ەكەنىن، كوشكىن ءقاۋپىن بىلدىرەدى؛

- تاۋلى اۋماقتاردا قاۋىپسىزدىك شارالارىن ساقتاڭىز؛

- ۇيگە قايتۋدى تاۋلىكتىڭ كەش ۋاقىتىنا كەشىكتىرمەڭىز، كەرى باعىتتى تابا الماۋىڭىز مۇمكىن؛

- ريۋكزاكتاردا مىنا قاجەتتى زاتتار بولۋى ءتيىس: جىلى كيىمدەر،كۇتپەگەن جاعدايدا دارىگەرگە دەيىنگى كومەك كورسەتۋگە ارنالعان ءدارى قوبديشاسى، GPS ناۆيگاتورلارىنىڭ بولۋى ارتىق بولمايدى.