قۇتقارۋشىلار اۋا رايىنىڭ قولايسىزدىعىنا ەسكەرتۋ جاسادى
الماتى قالاسىنىڭ توتەنشە جاعدايلار دەپارتامەنتى تاۋدا اباي بولۋعا شاقىردى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«7 اقپان كۇنى جىلىمىقتىن اسەرىنەن جانە قار جامىلعىسىنىڭ تۇراقسىز بولۋىنا بايلانىستى ۇلكەن جانە كىشى الماتى سۋ الابىندا قار كوشكىنى ءجۇرۋى مۇمكىن. قيىن جاعدايعا ۇرىنباس ءۇشىن تاۋ بوكتەرىنە شىعۋعا تىيىم سالىنادى. تاۋدا اباي بولىڭىزدار»، - دەپ ەسكەرتەدى الماتى قالالىق تجد باسپا ءسوز قىزمەتى.
وسىعان وراي، الماتى قالالىق تجد مىناداي مالىمدەمەسىن جاريا ەتتى:
- قاتتى جاۋىن-شاشىن (قار، جاڭبىر) نەمەسە قاتتى جەل تۋرالى داۋىل تۋرالى ەسكەرتۋ جاريالانعان جاعدايدا، ءتىپتى تاۋلى ايماققا بارۋدى كەيىنگە قالدىرعان دۇرىس.
- ەگەر ءسىز كىشىگىرىم توپىراق كوشكىندەردى بايقاساڭىز، وندا تاۋعا بارماعانىڭىز ءجون. جاۋىن-شاشىن تۇسكەن جاعدايدا تومەن تاۋلى ايماقتا توپىراق كوشكىن بولۋى مۇمكىن.
- ەگەر ءسىز تاۋدا بولساڭىز، مۇقيات بولىڭىز جانە اۋا رايىنىڭ وزگەرۋىن قاداعالاڭىز.
- تاۋ بوكتەرىندە قاردىڭ جىلجۋىن، قاردىڭ تۇيىرشىكتەرىن بايقاساڭىز، وندا تاۋلارعا بارماعانىڭىز ءجون، بۇل قاردىڭ تۇراقسىز كۇيدە ەكەنىن، كوشكىن بولۋ ءقاۋپى مۇمكىن ەكەنىن بىلدىرەدى.
- ۇيگە قايتۋدى تاۋلىكتىڭ كەش ۋاقىتىنا كەشىكتىرمەڭىز، كەرى باعىتتى تابا الماۋىڭىز مۇمكىن.
- ريۋكزاكتاردا مىنالار بولۋى ءتيىس: جىلى كيىمدەر، كۇتپەگەن جاعدايدا دارىگەرگە دەيىنگى كومەك كورسەتۋگە ارنالعان ءدارى قوبديشاسى، GPS ناۆيگاتورلارىنىڭ بولۋى ارتىق بولمايدى.
- تۋعان-تۋىستارىڭىز بەن جاقىندارىڭىزدى مارشرۋتىڭىزدىڭ باعىتى جانە ورنالاسقان جەرىڭىزدى بارىنشا تولىق حاباردار ەتۋ وتە ماڭىزدى.