كوتەرىلۋگە قيىن تاۋ شاتقالىنان بولەك، قولايسىز اۋا رايى دا كەرى اسەر ەتكەن.
رەسپۋبليكالىق جەدەل-قۇتقارۋ جاساعىنىڭ قۇتقارۋشىلارى ۇلكەن الماتى شىڭىنا كوتەرىلگەن تۋريستەردى قۇتقاردى، دەپ حابارلايدى Almaty-akshamy.kz قازاقپارات-قا سىلتەمە جاساپ.
قۇتقارۋشىلارعا زارداپ شەككەن ادام تۋرالى اقپارات 11 قىركۇيەكتە كەلىپ تۇسكەن. تجد جەدەل كەزەكشىسىنىڭ ايتۋىنشا، ۇلكەن الماتى شىڭى اۋدانىندا تۋريست قۇلاپ، ەكى اياعىن جاراقاتتاعان.
«رەسپۋبليكالىق جەدەل قۇتقارۋ جاساعىنىڭ (رجقج) جەدەل توبى دەرەۋ وقيعا ورنىنا شىقتى. قۇتقارۋشىلار جەدەل اۆتوكولىكپەن كوسموستانسياعا دەيىن جەتىپ، ودان ءارى جاياۋ باردى. ءبىرازدان سوڭ پروحودنوە شاتقالى ارقىلى زارداپ شەگۋشىگە كومەكتەسۋگە تاعى ءبىر جەدەل توپتى ىسكە قوسۋ تۋرالى شەشىم قابىلداندى. ەر ادام 12 قىركۇيەكتە تاڭعى ساعات 5-تە تابىلدى. ونىڭ قاسىندا تاعى 2 ادامنىڭ بارى انىقتالدى جانە ولار جارتاستى جەردە بولعان»، - دەپ حابارلايدى ق ر تجم رجقج باسپا ءسوز قىزمەتى.
حابارلامادا ايتىلعانداي، تۋريستەر ۇلكەن الماتى شىڭىنا باعىت العان. قاراڭعى تۇسكەنشە شىڭعا جەتىپ ۇلگەرمەيتىندىگىن تۇسىنگەن تۋريستەر كەرى قايتادى. قايتار جولدى قىسقارتقىسى كەلگەن تۋريستەر كەلگەن باعىتتارىنان تايىپ كەتكەن. ناتيجەسىندە ولار ءقاۋىپتى ءارى تىك جارعا تاپ بولعان. ال تۋريستەردىڭ ءبىرى 5 مەترلىك جاردان قۇلاپ، ەكى اياعىنان جاراقات العان.
قۇتقارىلعان ەر ادامعا وقيعا ورنىندا العاشقى مەديسينالىق كومەك كورسەتىلدى. جابىرلەنۋشىنىڭ جاعدايى قاناعاتتانارلىق، دەگەنمەن اۋىرلىق تيگىزدى. كوتەرىلۋگە قيىن تاۋ شاتقالىنان بولەك، مەجەلى جەرگە جەتۋگە اۋا-رايى دا اسەر ەتتى. سول ساتتە قاتتى جەلمەن قوسا جاڭبىر ارالاس قار جاۋدى. جابىرلەنۋشىنى زەمبىلمەن ۇزاق ۋاقىت تاسىمالداۋ مۇمكىن بولماعان سوڭ اۋە كەمەسى «قازاۆياقۇتقارۋ» مەكەمەسىنىڭ ماماندارىنا جۇگىنۋ تۋرالى شەشىم قابىلداندى.
قۇتقارۋشىلار ەر ادامدى تىكۇشاققا دەيىن اپاردى، ودان ءارى زارداپ شەگۋشى مەديسينا جانە اپاتتار ورتالىعىنا جەتكىزىلدى.