ۇلكەن الماتى كولىنە اپاراتىن جول جوندەلەدى

جوبالاۋ-سمەتالىق قۇجاتتاما دايىن.

ۇلكەن الماتى كولىنە اپاراتىن جولعا كۇردەلى جوندەۋ جۇمىستارىن جۇرگىزۋگە اۋقىمدى دايىندىق جۇمىستارى باستالدى. بۇل تۋرالى «قازاۆتوجول» ۇلتتىق كومپانياسىنىڭ باسپا ءسوز قىزمەتى مالىمدەدى، دەپ حابارلايدى Almaty-akshamy.kz.

ۇلتتىق كومپانيانىڭ مالىمەتىنشە، رەسپۋبليكالىق ماڭىزى بار «الماتى–كوسموستانسيا» تراسساسىنىڭ 8-34 شاقىرىم ارالىعى ۋچاسكەسى («الما-اراسان» شيپاجايىنا كىرەبەرىس) كۇردەلى جوندەۋدەن وتەدى.

«كەشە قوعامدىق تىڭداۋ ءوتتى. بەلسەندىلەر داۋىس بەرىپ، ۇلكەن الماتى كولىنە اپارار جولدى كۇردەلى جوندەۋگە قارسى ەمەس ەكەندىكتەرىن جەتكىزدى. بۇگىندە جوبالاۋ-سمەتالىق قۇجاتتاما دايىن، ەكولوگيالىق ساراپتاما ساتىسىندا تۇر. ساراپتامانىڭ وڭ قورىتىندىسىن العاننان كەيىن كونكۋرس جاريالانىپ، زاڭناماعا سايكەس مەردىگەر انىقتالادى. سودان كەيىن ۋچاسكەدە قۇرىلىس-مونتاج جۇمىستارى جۇرگىزىلەدى. ايتا كەتۋ كەرەك، جول ەكى جولاقتى بولىپ قالا بەرمەك. سونىمەن قاتار، جوبادا 1-گە 10 وتەمدىك اعاش وتىرعىزۋ قاراستىرىلعان»،- دەلىنەدى «قازاۆتوجول»-دىڭ حابارلاماسىندا.

كۇردەلى جوندەۋ جۇمىستارى اياسىندا اۋماقتا باقىلاۋ الاڭدارى، اۆتوكولىكتەرگە ارنالعان تۇراقتار جانە تاس قۇلاماسىنان قورعايتىن تورلار سالىنباق.

«كازاۆتوجول» ۇك وكىلدەرىنىڭ ايتۋىنشا، جول ينفراقۇرىلىمىن قايتا قۇرۋ جۇمىستارى ءتۋريزمدى ودان ءارى دامىتۋعا وڭ اسەر ەتەدى جانە قوناقتار مەن جەرگىلىكتى تۇرعىندار ءۇشىن قولايلى جاعداي جاسايدى. ال توتەنشە جاعدايلار كەزىندە ارنايى تەحنيكا جەرگىلىكتى جەرگە ودان دا جىلدام جەتەدى.

جوبانى 24 ايدا جۇزەگە اسىرۋ جوسپارلانىپ وتىر.

ايتا كەتەيىك، الماتى - كوسموستانسيا رەسپۋبليكالىق ماڭىزى بار جول III ساناتقا جاتادى، جابىنى - اسفالت-بەتون، ۇزىندىعى 26 شاقىرىم.