قالا باسشىسى قازاقستان پرەزيدەنتى قاسىم-جومارت توقايەۆتىڭ اتىنان الماتىنىڭ 31 تۇرعىنىنا مەملەكەتتىك ناگرادالاردى تاپسىردى، دەپ حابارلايدى اlmaty-akshamy.kz
ولاردىڭ قاتارىندا ەلدىڭ الەۋمەتتىك-ەكونوميكالىق جانە مادەني دامۋىنا ەلەۋلى ۇلەس قوسقان، قالانىڭ قوعامدىق ومىرىنە بەلسەندى قاتىسقان، قاڭتارداعى وقيعالار كەزىندە ازاماتتاردى قۇتقارۋ جانە قورعاۋ بارىسىندا باتىلدىق تانىتقان ازاماتتار بار.
«پاراسات» وردەنىمەن ق ر ۇلتتىق عىلىم اكادەمياسىنىڭ اكادەميگى كارىمبەك قۇرمانالييەۆ، «قازاقستان رەسپۋبليكاسىنىڭ قىزىل جارتى اي قوعامى» قب پرەزيدەنتى ەركەبەك ارعىمبايەۆ، «قۇرمەت» وردەنىمەن قازاقستان جازۋشىلار وداعى ءتوراعاسىنىڭ ورىنباسارى اقبەرەن ەلگەزەك، «شاپاعات» مەدالىمەن «ليدەر.kz» ەرىكتىلەر قوزعالىسى» قب باسشىسى ديلميرا بلاس، تۇرعىن ۇيدەگى ءورتتى ءسوندىرۋشى، اۋلا قىزمەتكەرى ارلان مۋتيشيەۆ جانە تاعى باسقالارى ماراپاتتالدى.
ءوزىنىڭ سوزىندە قالا اكىمى ەربولات دوسايەۆ مەملەكەت باسشىسىنىڭ شەشىمى بويىنشا مەملەكەتتىك ناگرادالارمەن ماراپاتتاۋ ءراسىمى العاش رەت كوكتەمگى جاڭارۋ كۇنى قارساڭىندا ءوتىپ وتىرعانىن اتاپ ءوتتى.
"ءدال وسى ناۋرىز مەرەكەسى قارساڭىندا پرەزيدەنت قاسىم-جومارت كەمەل ۇلى توقايەۆ «جاڭا قازاقستاندى» قۇرۋ جولىنداعى ساياسي جاڭارۋ مەن جاڭعىرتۋدىڭ ستراتەگيالىق پايىمىن باياندايتىن جولداۋىن جاريا ەتتى. مەملەكەت باسشىسى ەلدىڭ تۇراقتى ىلگەرىلەۋى مەن اۋقىمدى الەۋمەتتىك-ەكونوميكالىق وزگەرىستەر ساياسي جاڭعىرۋسىز مۇمكىن ەمەس ەكەنىن اتاپ ءوتتى"، – دەدى الماتى اكىمى.
كەزدەسۋ سوڭىندا قالا باسشىسى سالتاناتتى راسىمگە قاتىسۋشىلاردى لايىقتى مەملەكەتتىك ناگرادالارمەن قۇتتىقتاپ، جۇمىستا تابىس جانە جاڭا بيىكتەرگە جەتۋلەرىنە تىلەكتەستىك ءبىلدىردى.