الماتى، جامبىل جانە قىزىلوردا وبلىستارىندا يرريگاسيا جانە درەناج جۇيەلەرىن (يدج) كەشەندى رەكونسترۋكسيالاۋ جۇمىسى اياقتالۋعا جاقىن.
اتالعان جۇيەلەر ەگىس القاپتارىنا سۋ بەرىپ، جەراستى سۋلارىنىڭ دەڭگەيىن رەتتەيدى جانە توپىراقتىڭ تۇزدانۋىمەن كۇرەسەدى، دەپ حابارلايدى aqshamnews.kz Cۋ رەسۋرستارى جانە يرريگاسيا مينيسترلىگىنە سىلتەمە جاساپ.
الماتى وبلىسىنىڭ ەڭبەكشىقازاق اۋدانىندا يدج قايتا جاڭعىرتۋ جۇمىستارى ءجۇرىپ جاتىر، ونىڭ كومەگىمەن ۇلكەن الماتى كانالىنان 5 مىڭ گەكتار جەر سۋارىلادى. بۇگىنگى تاڭدا ۇزىندىعى 58،3 شاقىرىم بولاتىن ارنالار 90%-عا قايتا جاڭارتىلدى. سۋ بەرۋدى رەتتەيتىن 478 گيدروتەحنيكالىق قۇرىلىستىڭ 372ء-سى جوندەلدى.
جامبىل وبلىسىنىڭ شۋ اۋدانىندا وڭ جاعالاۋ ماگيسترالدىق كانالدان 5 مىڭ گەكتار جەرگە سۋ بەرەتىن يدج رەكونسترۋكسيالانۋدا. بۇگىنگى تاڭدا ۇزىندىعى 69،6 شاقىرىم كانال 83%-عا، ۇزىندىعى 25،3 شاقىرىم بولاتىن درەناج جۇيەسى 69%-عا، ۇڭعىمالار ورناتۋ جۇمىستارى 87%-عا اياقتالدى.
قىزىلوردا وبلىسىنىڭ جالاعاش اۋدانىندا 4 اۋىلدىق وكرۋگتە 15،1 مىڭ گەكتار ەگىس القابىن سول جاعالاۋ ماگيسترالدىق كانالىنان سۋمەن قامتاماسىز ەتەتىن يدج قايتا جاڭعىرتۋ بويىنشا «قىزىلوردا-1» جوباسى ىسكە اسىرىلىپ جاتىر. بۇگىنگى تاڭدا ۇزىندىعى 1427 شاقىرىم كانالدىڭ 95%-ى قايتا جاڭارتىلدى، 14 533 گيدروتەحنيكالىق قۇرىلىس جوندەلدى، ال 328 شاقىرىم درەناج جۇيەسىن رەكونسترۋكسيالاۋ 99%-عا اياقتالدى.
بارلىق ءۇش جوبانى وسى جىلدىڭ سوڭىنا دەيىن اياقتاۋ جوسپارلانىپ وتىر.
«بۇل جۇمىستاردىڭ بارلىعى دۇنيەجۇزىلىك بانكپەن بىرگە جۇزەگە اسىرىلىپ جاتقان ەلىمىزدىڭ وڭتۇستىگىندەگى سۋارۋ جانە درەناجدىق جۇيەلەردى جەتىلدىرۋ جوباسىنىڭ ەكىنشى كەزەڭىنىڭ بولىگى بولىپ تابىلادى. سونداي-اق، تۇركىستان وبلىسىندا ەكى يدج رەكونسترۋكسيالاۋ اياقتالۋعا جاقىن. وسىعان دەيىن جامبىل وبلىسىندا ەكى جوبا اياقتالدى. ورىندالعان جۇمىستار كانالداردىڭ تيىمدىلىگىن 25%-عا ارتتىرۋعا، سۋ شىعىنىن ازايتۋعا، سونداي-اق توپىراق جاعدايىن جانە اۋىل شارۋاشىلىعىن سۋمەن قامتاماسىز ەتۋ كورسەتكىشىن جاقسارتۋعا مۇمكىندىك بەردى»، - دەدى سۋ رەسۋرستارى جانە يرريگاسيا ۆيسە-مينيسترى ەربولات يبرايحانوۆ.