كەلىپ تۇسكەن ءوتىنىش نەگىزىندە ماڭعىستاۋ وبلىسىنىڭ جەر رەسۋرستارىن باسقارۋ دەپارتامەنتىمەن جاۋاپكەرشىلىگى شەكتەۋلى سەرىكتەستىككە قاتىستى جوسپاردان تىس تەكسەرۋ جۇرگىزىلدى.
ناتيجەسىندە مۇناي تەرمينالىنىڭ قۇرىلىسىن سالۋ جانە ورنالاستىرۋ ءۇشىن ارنالعان جالپى اۋدانى 50،0 گەكتار جەر ۋچاسكەسى ۇزاق ۋاقىت بويى نىسانالى ماقساتى بويىنشا پايدالانىلماي كەلگەنى انىقتالدى، دەپ حابارلايدى aqshamnews.kz.
اۋىل شارۋاشىلىعى مينيسترلىگىنىڭ مالىمەتىنشە، كاداسترلىق (باعالاۋ) قۇنى – 445،0 ملن.تەڭگەنى قۇرايتىن جەر ۋچاسكەسى كاسپيي تەڭىزىنىڭ جاعالاۋىنداعى قاراقيا اۋدانىندا ورنالاسقان.
جەر ۋچاسكەسىنىڭ مەنشىك يەسىنە جەر زاڭناماسىنىڭ تالاپتارىن بۇزۋشىلىقتاردى جويۋ تۋرالى نۇسقاما بەرىلدى. جىل اياقتالعاننان كەيىن نۇسقاما تالاپتارىن ورىنداماعانى ءۇشىن سەرىكتەستىككە 345،0 مىڭ تەڭگە كولەمىندە ايىپپۇل تۇرىندەگى اكىمشىلىك شارا قولدانىلدى.
سونىمەن قاتار دەپارتامەنتتىڭ جەر ۋچاسكەسىن مەملەكەت مەنشىگىنە ماجبۇرلەپ الىپ قويۋ تۋرالى تالاپ-ارىزى سوتپەن قاناعاتتاندىرىلىپ، سوت شەشىمى زاڭدى كۇشىنە ەندى.