ييدم اۆتوموبيل جولدارى كوميتەتى ءتوراعاسىنىڭ ورىنباسارى جامبىل باقتيار الماتى وبلىسىنىڭ ىلە، تالعار، قاراساي اۋداندارىنا بارىپ، جەرگىلىكتى تۇرعىندارىمەن كەزدەسۋ وتكىزدى، دەپ حابارلايدى Almaty-akshamy.kz.
تالقىلاۋ بارىسىندا ءوڭىر تۇرعىندارىن ۇلكەن الماتى اينالما تاس جولىنىڭ تولەم قۇنى ماسەلەسى قىزىقتىردى. بۇعان جامبىل باقتيار اقىلى جول قۇرىلىسىنا جۇمسالعان قاراجاتقا قاراي ەسەپتەلىپ جاسالعانىن جەتكىزدى.
- جىل سايىنعى ينفلياسيانىڭ ءوسۋىن دە قاراستىردىق. ءبىز ينۆەستوردىڭ قۇيعان قارجىسىن وزىنە قايتارىپ بەرۋگە مىندەتتىمىز. ونىڭ ۇستىنە، تالعار، ىلە، قاراساي اۋدان اكىمدەرىنىڭ پىكىرىنە قۇلاق اسىپ، جەرگىلىكتى حالىق تۇرعىندارى ءۇشىن ارنايى جەڭىلدىك قويدىق. باعالارى دا قولجەتىمدى. ال اۋىر جۇك كولىكتەرى بويىنشا باعانى قايتا باسشىلىقپەن قاراستىرامىز، - دەپ جاۋاپ بەردى اۆتوموبيل جولدارى كوميتەتى ءتوراعاسىنىڭ ورىنباسارى.
جيىندا، سونداي-اق، ابونەنتتىك تولەمدى الۋدىڭ امالدارى ايتىلدى. قويىلعان بارلىق سۇراققا «ءۇاااج ينۆەستيسيالار جانە وپەراسيالار» ج ش س جولدى پايدالانۋ جانە كۇتىپ-ۇستاۋ جونىندەگى جەتەكشىسى نۇرلانبەك ومىربايەۆ تۇشىمدى جاۋاپ بەرە الدى.
«پرەفەرەنسيا مەحانيزمىنە سايكەس ءبىر ايعا نەمەسە ءبىر جىلعا ابونەمەنتتى اكىمدىكتە نەمەسە ءار اۋداننىڭ ارنايى حالىققا قىزمەت كورسەتۋ ورتالىعىنان الۋعا بولادى. جولدى پايدالانۋشى تۇلعا RFID-بەلگىلەرىن (كولىك تۋرالى مالىمەتتەردى وقۋ جانە ەسەپتەۋ جۇيەسى) ارقىلى بىلە الادى. ەگەر ابونەمەنت اقىسى دەر كەزىندە تولەنبەگەن جاعدايدا، تاريف بويىنشا تولەم الىنادى. سونداي-اق، اقىنى الدىن الا تولەم نەگىزىندە وتسەڭىز بولادى نەمەسە ءجۇرىپ وتكەننەن كەيىن جەتى كۇن ىشىندە تولەي الاسىز. ياعني، ءسىز اقىلى جولمەن بايقاماي ءوتىپ كەتكەن بولساڭىز 7 تاۋلىك ارالىعىندا تولەم جاساي الاسىز. ال مەرزىمىنەن اسىپ كەتكەن جاعدايدا جۇرگىزۋشىگە اكىمشىلىك شارا قولدانىلۋى مۇمكىن. سونىمەن قاتار، ەگەر كولىك قۇرالى رۇقسات ەتىلگەن گاباريتتەن اسىپ كەتسە، وندا اقپارات بىردەن يندۋستريا جانە ينفراقۇرىلىمدىق دامۋ مينيسترلىگىنە بەرىلەدى»، - دەپ ءتۇسىندىردى نۇرلانبەك ومىربايەۆ.
سونىمەن قاتار، جيىن بارىسىندا ۇلكەن الماتى اينالما جولىنىڭ ارتىقشىلىقتارى دا اتالىپ ءوتتى. ماسەلەن، ەگەر ءسىزدىڭ كولىگىڭىز جول ۇستىندە سىنىپ قالعان جاعدايدا، ءۇاااج قىزمەتكەرلەرى كولىگىڭىزدى جاقىن جەردەگى تۇراققا تەگىن جەتكىزۋگە كومەكتەسەدى. ايتا كەتەيىك، ۇلكەن الماتى اينالما اۆتوموبيل جولىندا ساعاتىنا 140 شاقىرىم جىلدامدىقپەن ءجۇرۋ قاراستىرىلعان. جول پايدالانۋشىلاردىڭ قاۋىپسىزدىگىن قامتاماسىز ەتۋ ماقساتىندا جول بويىندا بەينەباقىلاۋ كامەرالارى ورناتىلعان. سونداي-اق، اتالمىش كۇرە جولعا قاتىستى 2277 قىسقا نومىرىنە تەگىن حابارلاسۋ ارقىلى ازاماتتار بارلىق اقپاراتتى بىلە الادى.
ءۇش كۇنگە سوزىلعان شارادا ءار اۋداننىڭ ءماسليحات دەپۋتاتتارى حالىق تاراپىنان ءسوز سويلەپ، ۇسىنىستارىن ايتتى. ماسەلەن، تالعار اۋدانىندا وتكەن جيىندا ءماسليحات دەپۋتاتى گۇلجان ءتۇسىبيانوۆا ۇلكەن الماتى اينالما جولى ماڭىن اباتتاندىرۋ ماسەلەسىن كوتەردى.
- تالعار ماڭىنا كوگالداندىرۋ جۇمىستارىن ىستەۋدى ۇسىنامىن. تاريف بويىنشا ايتاتىن بولسام، ءبىر جىلدىق تولەم اقىسىن تومەندەتسەنىزدەر جاقسى بولار ەدى. سەبەبى، ءبىر جىلدىق تولەم قاراپايىم حالىق ءۇشىن ءتيىمدى بولۋ كەرەك. تاعى ءبىر ماسەلە ءبىزدىڭ وڭىردە مۇمكىندىگى شەكتەۋلى ازاماتتار كوپ. ول كىسىلەر ءۇشىن ارنايى جەڭىلدىك قاراستىرىپ كورسەڭىزدەر، يگى بولار ەدى، - دەپ جەتكىزدى ءماسليحات دەپۋتاتى.
جامبىل باقتيار حالىقپەن كەزدەسۋ بارىسىندا قويىلعان سۇراقتارعا جاۋاپ بەرىپ قانا قويماي، تۇرعىندارمەن بىرگە ءۇاااج بويىن ارالاپ، تۋىنداعان ماسەلەلەرمەن تىكەلەي تانىسىپ، ينۆەستورلارعا جانە اۋدان اكىمدىكتەرىنە ءتيىستى تاپسىرمالار بەردى.