ۇلكەن الماتى اينالما اۆتوموبيل جولىمەن تۇيىسەتىن جولدار ماسەلەسى تالقىلاندى
ۇلكەن الماتى اينالما اۆتوموبيل جولىمەن تۇيىسەتىن وبلىس اۋماعىنداعى راديالدى جولداردىڭ قۇرىلىسىنا قاتىستى الماتى وبلىسىنىڭ اكىمى اماندىق باتالوۆ جوباعا قاتىسۋشى ىرگەلى مەكەمەنىڭ ءبىرى «Alsim Alarko» كومپانياسىنىڭ وكىلدەرىمەن كەزدەسۋ وتكىزدى، دەپ حابارلايدى Almaty-akshamy.kz الماتى وبلىسى اكىمىنىڭ باسپا ءسوز قىزمەتىنىڭ حابارىنا سىلتەمە جاساپ.
كەزدەسۋ بارىسىندا وبلىس اكىمىنىڭ ورىنباسارى جەڭىس تۇياقوۆ الماتى قالاسى شەكاراسىنان باستاپ ءۇاااج-عا دەيىن سالىناتىن وبلىس اۋماعىنداعى 6 راديالدى جولدىڭ قۇرىلىسىنا قاتىستى جۇمىستاردىڭ جاي-كۇيىنەن قىسقاشا حاباردار ەتتى. جالپى، قاراساي مەن ىلە اۋداندارىنىڭ اۋماعى ارقىلى الىپ جولعا ءتۇيىسۋى ءتيىس 6 جولدىڭ ۇزىندىعى 36 شاقىرىم. وسى 6 جولدىڭ 5-ەۋىنىڭ جوباسى مەملەكەتتىك ساراپتامانىڭ وڭ قورىتىندىسىن العان. ياعني، اباي، ساين، رىسقۇلوۆ، تىلەندييەۆ جانە سولتۇستىك جارتىلاي اينالما جولدارىنىڭ جوباسى دايىن. ال اقىن سارا كوشەسىنىڭ جوباسىنا الماتى قالاسىنىڭ باس جوسپارىنىڭ وزگەرۋىنە بايلانىستى تۇزەتۋلەر ەنگىزىلۋدە. ازىرگە ساين كوشەسى بويىنشا جەر ۋچاسكەلەرىنىڭ ماسەلەسى تولىق شەشىلگەن. قۇرىلىس جۇمىستارىنا 2،7 ملرد. تەڭگە بولىنگەن.
كەزدەسۋگە ارنايى كەلگەن «Alsim Alarko» كومپانياسى باس ديرەكتورىنىڭ ورىنباسارى ابباس شاحين وزدەرىنىڭ ءۇاااج جوباسىنا قاتىسۋشى رەتىندە وبلىستىڭ راديالدى جولدارىنىڭ قۇرىلىسىنا بايلانىستى ءوز ۇسىنىستارىن جەتكىزدى. ءۇاااج قۇرىلىسى اياقتالعانعا دەيىن وعان كەلىپ تۇيىسەتىن جولداردىڭ دا تولىق دايىن بولۋىنا بار كۇش-جىگەرىن جۇمسايتىن نيەتتەرىن ءبىلدىردى.
اماندىق باتالوۆ قۇرىلىس سالاسىندا تاجىريبەسى مول مەردىگەر ۇيىمنىڭ وبلىسپەن سەرىكتەستىك بايلانىستارىن نىعايتۋ تۋرالى ۇسىنىستارىنا ريزاشىلىعىن ءبىلدىردى. اڭگىمەلەسۋ بارىسىندا وبلىس اكىمى كومپانيانىڭ قۇرىلىس كونسترۋكسيالارىنىڭ قايدان اكەلىنەتىنىن، قانشا جۇمىسشى جۇمىس ىستەپ جاتقانىن سۇراپ ءبىلدى. كومپانيا وكىلى ابباس ءشاحيننىڭ ايتۋىنشا، قۇرىلىس جۇمىستارىندا 1100-گە جۋىق ادام جۇمىس ىستەيدى. سونىڭ 93%ء-ى جەرگىلىكتى ماماندار. جيىن بارىسىندا «Alsim Alarko» كومپانياسىنىڭ ءۇاااج جوباسىن ىسكە اسىرۋ جۇمىستارى تۋرالى شاعىن بەينەروليك كورسەتىلدى.
وبلىس باسشىسى راديالدى جولداردىڭ قۇرىلىسىن جۇزەگە اسىرۋ جوباسىنىڭ سەرىكتەستىك شارتتارى ۇكىمەت دەڭگەيىندە تالقىلانىپ، ءتيىستى شەشىم قابىلداناتىنىن ايتتى.
- ۇلكەن الماتى اينالما اۆتوموبيل جولى – وتە اۋقىمدى جوبا. سوندىقتان بۇل جوبانىڭ شەڭبەرىندە تاجىريبەسى مول، تەحنيكاسى كوپ، ماماندارى جەتكىلىكتى وسىنداي ءىرى مەردىگەر كومپانيامەن جۇمىس ىستەۋ بىزگە دە ءتيىمدى. ەكى تاراپ تا ءىستى ناقتى، ساپالى، دەر كەزىندە اتقارسا، سونىڭ ناتيجەسىندە جاسالعان جۇمىس حالىقتىڭ يگىلىگىنە اينالسا، ءبىز ءۇشىن باستى ماقسات سول، - دەدى اماندىق باتالوۆ.
جيىن بارىسىندا «Alsim Alarko» كومپانياسى وكىلدەرى جەڭىل رەلستى كولىك قاتىناسى قۇرىلىسىنا، ەلەكتر ەنەرگياسى سالاسىنا قاتىستى دا جوبالارعا قاتىسۋعا الەۋەتى بار ەكەندىكتەرىن ايتتى. بۇل رەتتە وبلىس باسشىسى اتالعان قۇرىلىس ۇيىمىن جوعارعى تالعار جانە جوعارعى قاسكەلەڭ تراسسالارىنىڭ رەكونسترۋكسيالاۋ جۇمىستارىنا، تالدىقورعانداعى «باسقۋات» قازاندىعىن قايتا جاڭعىرتۋ ىسىنە تارتۋعا بولاتىنىن ايتىپ، ءتيىستى سالا ماماندارىنا ارنايى تاپسىرما بەردى. وڭىردەگى اتالعان سالالاردىڭ لاۋازىمدى تۇلعالارى مەن قالا اكىمدىگى «Alsim Alarko» كومپانياسى ماماندارىمەن كەزدەسىپ، ماسەلەلەردى ەگجەي-تەگجەيلى تالقىلايتىن بولادى.