بۇل - الىپ شاھاردىڭ باس پوليسەيىنىڭ ءسوزى.
الماتى قالاسى پوليسيا دەپارتامەنتىنىڭ باسشىسى قانات دانيار ۇلى تايمەردەنوۆ الماتى تەلەارناسىنداعى AKIMAT LIVE باعدارلاماسىندا قوناقتا بولدى، دەپ حابارلايدى Almaty-akshamy.kz.
باس پوليسەي بۇگىندە سەرۆيستىك پوليسيا ۇعىمىنىڭ كەڭىرەك تانىلىپ كەلە جاتقانىن اتاپ ءوتىپ، ق ر پرەزيدەنتى قاسىم-جومارت توقايەۆتىڭ جولداۋىندا تۇجىرىمدالعان ءتارتىپ ساقشىلارىنىڭ اتقارار ءرولى مەن قىزمەتىنە جان-جاقتى توقتالدى.
«پوليسيا حالىققا ەتەنە جاقىن بولۋى كەرەك. دەپارتامەنت قىزمەتكەرلەرىنىڭ الەۋمەتتىك جەلىدە 500-گە تارتا پاراقشاسى جۇمىس ىستەيدى. پوليسيا دەپارتامەنتىنىڭ باسشىلىعى مەن بولىمدەرى قالالىق كسك-نىڭ توپتىق چاتتارىندا تىركەلگەن. ناتيجەسىندە قالا تۇرعىندارىنىڭ وتىنىشتەرى ەداۋىر ازايعان»، – دەدى قانات تايمەردەنوۆ.
«ەگەر بۇرىندارى كۇنىنە 12-13 مىڭ ساۋال قابىلداساق، ال ءقازىر 5-6 مىڭعا دەيىن قىسقارعان. ءبىز الماتى اكىمدىگىمەن بىرگە ءۇش جىلدىق جوسپاردى بەكىتتىك. وسى جوسپارعا سايكەس، قالالىق پوليسيا قىزمەتكەرلەرىنە الەۋمەتتىك جاعداي جاساۋ قاراستىرىلعان. دالىرەك ايتساق، الماتى قالاسىنىڭ ۋچاسكەلىك پوليسيا بولىمشەلەرى ءۇشىن 29 ءۇي ساتىپ الۋ جوسپارلانعان. بيىل توعىز پۋنكت اشۋدى كوزدەپ وتىرمىز. ولار جەتىسۋ، تۇركسىب، ناۋرىزباي جانە الاتاۋ اۋداندارىندا پايدا بولادى»، – دەدى سپيكەر.