قازاقستاننىڭ ىشكى ىستەر مينيسترلىگى ۇلانعاسىر كامييەۆتىڭ "ايەلدەر حيدجاب كيمەگەنى ءۇشىن كۇيەۋلەرى ولاردى ولتىرەدى" دەگەن مالىمدەمەسىندە زاڭ بۇزۋشىلىقتاردى انىقتامادى، دەپ حابارلايدى aqshamnews.kz.
ىشكى ىستەر مينيسترلىگىنىڭ جاۋابىندا سايدا سيسەمبايەۆا بەرگەن ارىز قارالىپ، نومەنكلاتۋرالىق وندىرىسكە جىبەرىلگەنى ايتىلعان. قۇزىرلى ورگاندار ءانشىنىڭ ايتقان سوزدەرىندە زاڭ بۇزۋشىلىق بەلگىلەرىن كورمەگەن.
«ۇلانعاسىر كامييەۆ ءوزىنىڭ Instagram پاراقشاسىندا جازىلۋشىلارمەن ديالوگ جۇرگىزىپ، ولاردىڭ سۇراقتارىنا جاۋاپ بەرگەن. بۇل ارەكەت قازاقستان رەسپۋبليكاسىنىڭ قىلمىستىق كودەكسىنىڭ 174-بابىنىڭ 1-بولىگىنە سايكەس قىلمىستىق قۇقىق بۇزۋشىلىق قۇرامىن قالىپتاستىرمايدى. قىلمىستىق قۇقىق بۇزۋشىلىق قۇرامىنىڭ بولماۋىن ەسكەرە وتىرىپ، ارىز ءبىرىڭعاي سوتقا دەيىنگى تەرگەپ-تەكسەرۋ تىزىلىمىنە تىركەلمەستەن نومەنكلاتۋرالىق وندىرىسكە جىبەرىلدى»، — دەلىنگەن ماتىندە.
بۇعان دەيىن الەۋمەتتىك جەلىدە ءانشىنىڭ ايەلدەردىڭ حيدجاب كيمەگەنى تۋرالى قاتتى سىن ايتقان ۆيدەوسى تاراعان بولاتىن.
"ايەلدەردى ولتىرەدى، ويتكەنى ولار حيدجاب كيمەيدى. ولار ەر ادامداردى تارتىپ، كورىكسىز كۇيدە جۇرەدى. كۇيەۋلەرى ولاردى قىزعانىشتان ولتىرەدى. حيدجابتى سانالى تۇردە كيگەن ايەل، ءتىپتى باسىن كەسىپ تاستاسا دا، ونى شەشپەيدى. مەن ايەلىمە حيدجاب كيگىزەمىن"، — دەپ مالىمدەگەن ءانشى.
قوستاناي تۇرعىنى سايدا سيسەمبايەۆا قۇقىق قورعاۋ ورگاندارى مەن دەپۋتاتتاردىڭ ءانشىنىڭ سوزدەرىنە نازار اۋدارماعانىنا تاڭعالعانىن ايتىپ، الەۋمەتتىك جانە گەندەرلىك ارازدىقتى قوزدىرۋعا قاتىستى ءانشىنىڭ ارەكەتتەرىن تەكسەرۋدى تالاپ ەتكەن. ايەل e-Otinish پورتالى ارقىلى پوليسياعا ارىز جازعان.