قازاقستان رەسپۋبليكاسى ۇلتتىق ۇلانى باس قولباسشىسىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى، حالىق قاھارمانى، گەنەرال-مايور قايرات ۇمبەتوۆ الماتىدا تىل ارداگەرى وتستاۆكاداعى مايور باكەشيەۆ عالىمجان اقساقالمەن كەزدەستى.
بيىل اتالىپ وتەتىن ۇلى وتان سوعىسىنداعى جەڭىستىڭ 80 جىلدىعى قارساڭىندا تىل ارداگەرىنىڭ شاڭىراعىنا ات باسىن بۇرىپ، ءارى ۇلتتىق ۇلاننىڭ قۇرىلعان كۇنىمەن ارنايى قۇتتىقتاي كەلگەن ۇلاندىقتاردى قارت ارداگەر عالىمجان ءجۇنىس ۇلى مەن ومىرلىك جارى قونىسكۇل اپا قۋانا قارسى الدى.
سوعىس باستالعان ۋاقىتتا عالىمجان اتا نەبارى التى جاستا ەدى. ءوزى سياقتى بۋىنى بەكىپ، بۇعاناسى قاتپاعان ورەندەردىڭ بالالىق شاعىن سوعىس ۇرلاعان بولاتىن. ولار ءسابي بولىپ ەركەلەمەدى، بالا بولىپ وينامادى، ەڭبەككە ەرتە ارالاسىپ، اۋىلداعى ەر-ازاماتتاردىڭ ورنىن باستى، ايەل-انالارىمەن بىرگە تىلدا ەڭبەك ەتە ءجۇرىپ، جەڭىس كۇنىنىڭ جاقىنداۋىنا ۇلەسىن قوستى.
ءقازىر سوعىس جىلدارىنداعى بالالاردىڭ ەڭبەگى ەلەنىپ، تىل ارداگەرلەرىنە تەڭەستىرىلگەن. عالىمجان اقساقالعا دا وسى مارتەبە بەرىلدى. سونىمەن قاتار عالىمجان ءجۇنىس ۇلى – ۇلتتىق ۇلاننىڭ قارت ارداگەرلەرىنىڭ ءبىرى. ول 1960 جىلدان باستاپ كسرو-نىڭ ىشكى اسكەرىندە ءار ءتۇرلى قىزمەتتەردە بولعان. كسرو ءىىم قازاق ءسسر-ى جانە قىرعىز ءسسر-ى بويىنشا ىشكى اسكەر باسقارماسىندا ساياسات ءبولىمىنىڭ نۇسقاۋشىسى لاۋازىمىندا زەينەتكە شىققان.
– ءسىز ۇلتتىق ۇلان جاۋىنگەرلەرىنە اسكەري-پاتريوتتىق تاربيە بەرۋ جۇمىسىنا ۇدايى بەلسەندى اتسالىسىپ كەلەسىز. ولارعا جاۋىنگەرلىك قىزمەتتەرىن ورىنداۋدا اقىل-كەڭەس، كومەك بەرۋدەن جالىققان ەمەسسىز. ءسىزدىڭ ونەگەلى ءومىرىڭىز، تاعىلىمعا تولى تاجىريبەڭىز ءبىز ءۇشىن وتە قۇندى. ءسىزدى قازاقستان رەسپۋبليكاسىنىڭ ۇلتتىق ۇلانى كۇنىمەن قۇتتىقتايمىز. دەنساۋلىعىڭىز مىقتى بولسىن! – دەپ تىلەك ءبىلدىردى قايرات جارىلقاسىن ۇلى ارداگەرگە ۇلتتىق ۇلان باس قولباسشىسىنىڭ العىس حاتىن تابىستاپ، سىي-سياپات ۇسىندى.
تىل ارداگەرى وتستاۆكاداعى مايور باكەشيەۆ عالىمجان قاريا ۇلاندىقتاردىڭ قۇرمەتىنە ريزا بولىپ، اق باتاسىن بەردى.