الماتى قالاسى ءبىلىم باسقارماسىنا قاراستى قالالىق ءبىلىم بەرۋدەگى جاڭا تەحنولوگيالاردىڭ عىلىمي-ادىستەمەلىك ورتالىعىنىڭ باستاماسىمەن قازاق ءتىلى مەن ادەبيەتى ءپانى مۇعالىمدەرىنىڭ اراسىندا وڭىرلىك كاسىبي «بابالار اماناتى» بايقاۋى ءوتتى.
بايقاۋدىڭ ماقساتى – اتاۋلى كۇندەردى جانە مەرەيتوي يەلەرىنىڭ مۇرالارىن ناسيحاتتاۋ، تاريحقا قۇرمەتپەن قاراپ، بابالار تاعىلىمىن دارىپتەۋ. اتالمىش بايقاۋدىڭ تاقىرىپتارى دا ەرەكشە بولدى. ماسەلەن، ماحمۇد ءقاشقاريدىڭ 995 جىلدىعىنا ارنالعان سايىس «شەشەندىك ونەر» دەپ اتالسا، قاسىم حاننىڭ 580 جىلدىعىن قامتىعان ايتىس نوميناسياسىنا «ايتسىن دەپ اقيقاتتى ءتىل بەرىلگەن» دەپ ايدار تاعىلدى. بايقاۋدىڭ تۇرار رىسقۇلوۆتىڭ 130 جىلدىعىن ارقاۋ ەتكەن ادەبي ءبولىمى «ءبىر شىعارما ىزىمەن» دەپ اتالسا، ءىلياس جانسۇگىروۆتىڭ 130 جىلدىعىن قاۋزاعان نوميناسيا «ءومىر – ونەر، ونەر – ولشەم...» دەگەن ايدارمەن ءورىلدى. ال «اقىننىڭ قالامى – ادالدىق الاڭى» سايىسى تۇمانباي مولداعالييەۆتىڭ 90 جىلدىعىنا باعىشتالدى.
– مەملەكەت باسشىسى قاسىم-جومارت كەمەل ۇلى تاريحىمىزعا قاتىستى اتاۋلى داتالار مەن بەلگىلى تۇلعالارىمىزدىڭ مەرەيتويلارىن جوعارى دەڭگەيدە اتاپ ءوتۋ ۇلتتىق بىرەگەيلىكتى نىعايتۋ جولىنداعى ماڭىزدى قادام ەكەنىن ۇنەمى ايتىپ كەلەدى. ءيا، سوڭىنا قالدىرعان ءىزى ەشقاشان جوعالمايتىن، اتى دا ماڭگىلىك بولىپ قالۋعا ءتيىس تاريحي تۇلعالار ۇلت رۋحانياتى مەن مادەنيەتىنىڭ التىن ارقاۋى بولاتىنى ءسوزسىز. مىڭ سان شاكىرتكە ءبىلىم بەرىپ جۇرگەن مۇعالىمدەر اراسىندا وتكىزگەن «بابالار اماناتى» بايقاۋىمىز ويداعىداي ءوتتى. ۇستازدار دا وزدەرىن باسقا قىرىنان كورسەتتى. بۇل بايقاۋدى الداعى ۋاقىتتا وقۋ-اعارتۋ مينيسترلىگىنىڭ تىزبەسىنە ەنگىزۋدى كوزدەپ وتىرمىز، – دەيدى سايىستى ۇيىمداستىرۋشى، قالالىق ءبىلىم بەرۋدەگى جاڭا تەحنولوگيالاردىڭ عىلىمي-ادىستەمەلىك ورتالىعىنىڭ قازاق ءتىلى ءپانىنىڭ ادىسكەرى قالامقاس شاكرەتوۆا.
بايقاۋ جەڭىمپازدارى «ALATAU» وقۋشىلاردىڭ يننوۆاسيالىق شىعارماشىلىق ورتالىعىندا ماراپاتتالدى. ارىپتەستەرىن جارقىن جەڭىستەرىمەن قۇتتىقتاعان قالالىق ءبىلىم بەرۋدەگى جاڭا تەحنولوگيالاردىڭ عىلىمي-ادىستەمەلىك ورتالىعىنىڭ ديرەكتورى داۋرەن ساعىنعالييەۆ بيىك بەلەستەر تىلەپ، الماتى قالاسى ءبىلىم باسقارماسىنىڭ ءى، ءىى، ءىىى دارەجەلى ديپلومدارىن ۇسىنىپ، ەستەلىك ستاتۋەتكامەن قۋانتتى.
بايقاۋعا الماتى قالاسىنىڭ 8 اۋدانىنان 38 ءمۇعالىم، ىرگەمىزدەگى الماتى وبلىسىنان 4 ۇستاز قاتىستى. سونىمەن، «اقىننىڭ قالامى – ادالدىق الاڭى» نوميناسياسىنىڭ 1-ورنىن №201 مەكتەپ-گيمنازيانىڭ قازاق ءتىلى مەن ادەبيەتى ءپانى ءمۇعالىمى مەرۋەرت ۇسەن قىزى، «ايتسىن دەپ اقيقاتتى ءتىل بەرىلگەن» اقىندار ايتىسىنىڭ 1-ورنىن №140 گيمنازيانىڭ ءمۇعالىمى التىنبەك يبراگيموۆ پەن №8 ورتا مەكتەپتىڭ (الماتى وبلىسىنان) ۇستازى نازگۇل كارىموۆا يەلەندى. «ءبىر شىعارما ىزىمەن» ادەبي سايىسىنىڭ ءبىرىنشى جۇلدەسى №109 جالپى ءبىلىم بەرەتىن مەكتەپتىڭ ءمۇعالىمى اقبوپە جاماۋبايقىزىنا، «شەشەندىك ونەر» №82 جالپى ءبىلىم بەرەتىن مەكتەپتىڭ ۇستازى ايدانا پانعا بۇيىردى. ال «ءومىر – ونەر، ونەر – ولشەم...» نوميناسياسىنىڭ 1-ورنىن №198 جالپى ءبىلىم بەرەتىن مەكتەپتىڭ قازاق ءتىلى مەن ادەبيەتى ءپانى ءمۇعالىمى قارلىعاش اتايبەكوۆا يەلەنىپ، مەرەيى ۇستەم بولدى.