ەكىنشى رەپاترياسيا رەيسى 1 ناۋرىزعا جوسپارلانعان.
ۋكرايناداعى قازاقستاندىقتاردىڭ العاشقى لەگى بۇگىن تۇندە جەتكىزىلەدى. بۇل تۋرالى الماتى حالىقارالىق اۋەجاي باسپا ءسوز قىزمەتى ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
« قازاقستاندىقتار وتىرعان اۋە كەمەسى كاتوۆيسە قالاسىنىڭ ۋاقىتى بويىنشا ساعات 10:30-دا اتىراۋعا ۇشىپ شىعادى. الماتىعا تۇنگى ساعات 00.30-دا كەلەدى دەپ كۇتىلۋدە. ب ا ق وكىلدەرى ءۇشىن باسپا ءسوز ءماسليحاتى ۇيىمداستىرىلادى»،- دەپ حابارلادى اۋەجاي باسپا ءسوز قىزمەتى.
ۆەدومستۆا مالىمەتىنشە، ەكىنشى رەپاترياسيا رەيسى 1 ناۋرىزعا جوسپارلانعان.
بۇعان دەيىن ۋكرايناداعى قازاقستان ازاماتتارىن اكەلۋگە 179 ورىندىق ۇشاق پولشاعا اتتانىپ كەتكەنى تۋرالى حابارلاعان بولاتىنبىز.
28 اقپاندا قازاقستان ازاماتتارىن شىعارۋ بويىنشا «كس 2203» ءبىرىنشى رەيسى اتىراۋ قالاسىنان كاتوۆيسە قالاسىنا (پولشا) نۇر-سۇلتان ۋاقىتى بويىنشا ساعات 09:53-تە ۇشىپ كەتتى. اۋە كەمەسىنىڭ ءتيپى – ا321، سىيىمدىلىعى – 179 ورىن.