كييەۆتەگى ەلشىلىكتىڭ قىزمەتكەرلەرى كۇنى-تۇنى جۇمىس ىستەۋدە
ۋكراينا كەپتەلىستە تۇرعان قازاقستاندىقتاردىڭ جارتىسى شەكارادان ءوتىپ، پولشاعا جەتتى. بۇل تۋرالى ق ر سىرتقى ىستەر مينيسترلىگىنىڭ رەسمي وكىلى ايبەك سمادياروۆ ءمالىم ەتتى، دەپ حابارلايدى Almaty-akshamy.kz.
«سوڭعى بىرنەشە كۇن بويى الەمنىڭ نازارى ۋكراينادا. ءبىزدىڭ كييەۆتەگى ەلشىلىكتىڭ قىزمەتكەرلەرى كۇنى-تۇنى جۇمىس ىستەۋدە. قازاقستاننىڭ ازاماتتارىنا كومەك كورسەتىپ قانا قويماي، ورنالاسقان ەلدەرىندەگى جاعداي جونىندە وزەكتى اقپاراتتى دا جىبەرىپ تۇرادى. شۇعىل اقپارات الماسۋ، تۋىنداعان ماسەلەلەردى جەدەل شەشۋ ماقساتىندا ارينە بەلگىلى ءبىر مەسسەندجەردە جۇمىس چاتىن اشتىق. سول چاتتا بىرگە قۋانىپ، بىرگە كۇرسىنىپ جاتامىز. ۋكرايناداعى ارىپتەستەرىمىزگە سۇراقتاردى جاۋدىرىپ، سول تۇرعان جەرىندە جاۋاپ بەر دەپ جازاتىنىمىز دا بار»، - دەپ جازدى ايبەك سمادياروۆ Facebook پاراقشاسىندا.
سونداي-اق، مينيسترلىك وكىلى شەكارادا تۇرعان وتانداستارىمىزدىڭ جارتىسى پولشاعا جەتكەنىن حابارلادى.
«كەشە عانا باق-قا ارنالعان بريفينگتە ايتىپ وتكەنىمدەي، ق ر ازاماتتارى بار بىرنەشە اۆتوبۋس شەكاراعا قاراي جولدا كولىك كەپتەلىسىندە تۇردى. ولاردىڭ جارتىسى شەكارادان ءوتىپ، امان-ەسەن پولشانىڭ اۋماعىندا ازاماتتارىمىزدىڭ ەكىنشى توبى كەلگەنشە قوناق ۇيگە ورنالاستىردى»، - دەيدى ول.
ەسكە سالا كەتەيىكە، كەشە سىرتقى ىستەر مينيسترلىگى قازاقستاندىقتار مىنگەن 3 اۆتوبۋستىڭ ۋكراينا شەكاراسىندا تۇرعانى تۋرالى حابارلاعان ەدى.