سوتتالعان بالالار العىس ايتۋ كۇنى قارساڭىندا اتا-انالارىمەن قاۋىشتى

ءوز كەزەگىندە بالالار دا ايتۋلى كۇنگە ارناعان ونەرلەرىن ورتاعا سالدى

الماتى قالاسىنىڭ قاج دەپارتامەنتىنە قاراستى لا-155/6 مەكەمەسىندە كامەلەتكە تولماعان جازاسىن وتەۋشى جاسوسپىرىمدەردىڭ اسىعا كۇتەتىن ءىس-شارالارىنىڭ ءبىرى «اشىق ەسىك» كۇنى. بۇل كۇنى ولار كوپتەن كورمەگەن اتا-انالارىمەن، جاقىن تۋىستارىمەن قاۋىشىپ، قۋانىشقا بولەنەدى. جۋىردا اتالعان بالالار كولونياسىندا «العىس ايتۋ كۇنى» قارساڭىندا «اشىق ەسىك» كۇنى وتكىزىلىپ، جاسوسپىرىمدەر شاتتىققا بولەندى، دەپ حابارلايدى Almaty-akshamy.kz.

سونىمەن قاتار «اشىق ەسىك» كۇنىنە الماتى قالاسىنىڭ ءبىلىم باسقارماسىنا قاراستى «№6 وقۋشىلار ءۇيى يۋنەسكو كلۋبىنىڭ» ديرەكتورى زەينەپ اريشيەۆا جانە ۇلتتىق اسپاپتار مەن دومبىرا ۇيىرمەسىنىڭ جەتەكشى ۇستازى مەرحات اكبيموۆ باستاعان ونەرپازدار قاتىسىپ، مەرەكە شىرايىن كىرگىزدى.

ءوز كەزەگىندە بالالار دا ايتۋلى كۇنگە ارناعان ونەرلەرىن ورتاعا سالىپ، ءبىرى دومبىرادان كۇمبىرلەتە كۇي توكسە، ءبىرى اۋەلەتە ءان سالدى.

«اشىق ەسىك» كۇنىن قۇتتىقتاۋ سوزبەن اشقان مەكەمە  باستىعى ادىلەت پودپولكوۆنيگى ميراس تولۋبايەۆ كەلۋشىلەردى كامەلەتكە تولماعان جازالى بالالاردىڭ كولونياداعى جاعدايىمەن تانىستىرىپ، مەرەيلى مەرەكەنىڭ كوڭىلدى وتۋىنە ات سالىسقان قوناقتارعا العىس ءبىلدىردى.

مەرەكە كەزىندە ءارتۇرلى قىلمىس جاساپ، جازاسىن وتەپ جۇرگەن جاسوسپىرىمدەر اتا-انالارى مەن تۋعاندارىنا شىن كوڭىلدەن العىس ايتىپ، مەرەكەلىك داستارحاندا باس قوستى.