ورتالىقتاندىرىلعان جىلۋمەن قامتاماسىز ەتىلگەن 80 قالادا جۇيەنىڭ توزۋ كورسەتكىشى 92%-عا دەيىن جەتكەن. ۇكىمەتتىڭ كەڭەيتىلگەن كەڭەسىندە مەملەكەت باسشىسى قاسىم-جومارت توقايەۆ وسىنداي دەرەك كەلتىردى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ينفراقۇرىلىمدى، ءبىرىنشى كەزەكتە كوممۋنالدىق ينفراقۇرىلىمدى، ودان ءارى دامىتۋ جونىندەگى جۇمىستى تۇبەگەيلى قايتا قۇرۋ قاجەت. وسى قىستا جىلۋمەن قامتاماسىز ەتۋ سالاسىنىڭ ءساتسىز جۇمىسى ازاماتتاردىڭ نارازىلىعىن تۋدىردى. جىلۋ-ەلەكتر ورتالىقتارىنىڭ جارتىسىنان كوبى ءقاۋىپتى دەڭگەيدە، كەيبىر قالالاردا توزۋ دەڭگەيى 80%-دان استى»، - دەدى مەملەكەت باسشىسى.
قاسىم-جومارت توقايەۆ ەلدەگى جىلۋ جەلىلەرىنىڭ ورتاشا توزۋ كورسەتكىشى 54%-دىڭ توڭىرەگىنە جەتكەنىن دە اتاپ ءوتتى.
«ال ورتالىقتاندىرىلعان جىلۋمەن قامتاماسىز ەتىلگەن 80 قالادا بۇل كورسەتكىش – 75-تەن 92%-عا دەيىن. كوممۋنالدىق سالانى جاڭعىرتۋ ماقساتىندا مەن «ينۆەستيسيا ورنىنا تاريف» ساياساتىنا كوشۋدى قامتاماسىز ەتۋدى تاپسىردىم. قازىرگى جاعدايدا ۇكىمەت جىلدار بويى قوردالانعان ماسەلەلەردى شەشۋگە ءماجبۇر بولادى. ءبىراق باسقا جول جوق»، – دەدى پرەزيدەنت.