ءاليحان سمايىلوۆ كوستەنكو شاحتاسىنداعى اپاتتىڭ سەبەپتەرىن تەرگەۋ جونىندەگى ۇكىمەتتىك كوميسسيانى باسقاراتىن بولادى، دەپ حابارلايدى Almaty-akshamy.kz
مەملەكەت باسشىسىنىڭ تاپسىرماسىنا سايكەس پرەمەر-مينيستر ءاليحان سمايىلوۆتىڭ توراعالىعىمەن قاراعاندى وبلىسىندا «ارسەلورميتتال تەمىرتاۋ» اق-نىڭ كوستەنكو اتىنداعى شاحتاسىندا ورىن العان اپاتتىڭ سەبەپتەرىن تەرگەۋ جانە ونىڭ سالدارىن جويۋ جونىندەگى ۇكىمەتتىك كوميسسيا قۇرىلدى.
ونىڭ قۇرامىنا پرەمەر-مينيستردىڭ ءبىرىنشى ورىنباسارى رومان سكليار، توتەنشە جاعدايلار ءمينيسترى سىرىم ءشارىپحانوۆ، ىشكى ىستەر ءمينيسترى ەرجان سادەنوۆ، دەنساۋلىق ساقتاۋ ءمينيسترى اجار عينيات، ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا، ونەركاسىپ جانە قۇرىلىس ءمينيسترى قانات شارلاپايەۆ، قۇقىق قورعاۋ ورگاندارىنىڭ، قاراعاندى وبلىسى اكىمدىگىنىڭ، ەڭبەك ينسپەكسياسىنىڭ، «قورعاۋ» كومىر وندىرۋشىلەر كاسىپوداعىنىڭ وكىلدەرى جانە ت.ب. كىردى.
شاحتاداعى ءورتتىڭ سالدارىنان توپتىق جازاتايىم جاعدايدىڭ سەبەپتەرىنە جان-جاقتى تەرگەۋ جۇرگىزىلەتىن بولادى. سونىمەن قاتار كەلتىرىلگەن زالالدى باعالاۋ، زارداپ شەككەندەرگە جانە قازا تاپقانداردىڭ وتباسىلارىنا العاشقى كومەك كورسەتۋ جونىندە شارالار قابىلدانادى.
سونداي-اق، ۇكىمەت «ارسەلورميتتال تەمىرتاۋ» اق اكسيونەرلەرىمەن الدىن الا ۋاعدالاستىققا قول جەتكىزگەنىن جانە كاسىپورىننىڭ مەنشىك قۇقىعىن قازاقستان رەسپۋبليكاسىنىڭ پايداسىنا بەرۋ تۋرالى كەلىسىمشارتتى راسىمدەۋ اياقتالۋ ۇستىندە ەكەندىگىن حابارلايمىز.