ءتيىستى زاڭ جوباسى ازاماتتاردىڭ بورىش جۇكتەمەسىن ازايتۋ، الەۋمەتتىك شيەلەنىستى جەڭىلدەتۋ، قارىزدار بويىنشا تولەمدەردى ىنتالاندىرۋ جانە بورىشكەرلەردى ءونىمدى ەكونوميكالىق قىزمەتكە قايتارۋدى قامتاماسىز ەتۋ ماقساتىندا ازىرلەندى.
قارجى مينيسترلىگى «ازاماتتاردىڭ تولەم قابىلەتتىلىگىن قالپىنا كەلتىرۋ جانە بانكروتتىعى تۋرالى» قازاقستان رەسپۋبليكاسى زاڭىنىڭ جوباسى جانە وعان ىلەسپە زاڭ جوبالارى بويىنشا جۇمىستى اياقتادى. 21 زاڭنامالىق اكتىگە (8 كودەكس پەن 13 زاڭعا) وزگەرىستەر مەن تولىقتىرۋلار ەنگىزۋ كوزدەلىپ وتىر، دەپ حابارلايدى Almaty-akshamy.kz Primeminister.kz-كە سىلتەمە جاساپ.
زاڭ جوبالارىن تالقىلاۋ بارىسىندا جۇمىس توبىنىڭ 10 وتىرىسى ءوتتى، 100-دەن استام ۇسىنىس پەن ەسكەرتۋلەر قارالدى، «ەلەكتروندىق ۇكىمەت» پلاتفورماسى ارقىلى قويىلعان 276 سۇراققا جاۋاپ بەرىلدى. ۇسىنىستار نەگىزىندە زاڭ جوبالارىنا وزگەرىستەر ەنگىزىلدى، ونىڭ ىشىندە: بانكروتتىق تۋرالى وتىنىشتەردى بەرۋ ءراسىمى جەڭىلدەتىلدى، الەۋمەتتىك جاعىنان از قامتىلعان ادامدارعا مەملەكەتتىك كومەك قاراستىرىلدى، بىتىمگەرشىلىك كەلىسىم جاساسۋ مۇمكىندىگى ەنگىزىلدى، بانكروتتاردىڭ قارجىلىق ساۋاتتىلىقتى ارتتىرۋ كۋرستارىنان مىندەتتى تۇردە ءوتۋى، ت.ب. ەنگىزىلدى.
كەڭەس قورىتىندىسى بويىنشا ق ر پرەمەر-مينيسترى ءاليحان سمايىلوۆ ۋاكىلەتتى مەملەكەتتىك ورگاندارعا كەلىسىلمەگەن ماسەلەلەر بويىنشا ءبىرىڭعاي ۇستانىمدار ازىرلەۋدى جانە وتاندىق زاڭنامادا قاراستىرىلعان بارلىق ساراپتامالاردى جۇرگىزۋدى تاپسىردى.