ەلىمىزدە كۇن كۇرت سۋىتىپ كەتتى.
سمايىلوۆ اكىمدەرگە وتىرىك اقپارات پەن فەيكتەرگە توسقاۋىل قويۋدى تاپسىردى، دەپ حابارلايدى Almaty-akshamy.kz
“جالپى ەلىمىزدە كۇن كۇرت سۋىتىپ كەتتى. وسىعان بايلانىستى كوممۋنالدىق جۇيەلەرگە تۇسەتىن جۇكتەمە دە ارتا تۇسەدى. مۇنداي كەزدە جىلۋ جانە ەنەرگيا وبەكتىلەرىندە شتاتتان تىس جاعدايلار ورىن الاتىنى ءمالىم. تەحنولوگيالىق اقاۋلارعا بايلانىستى ينسيدەنتتەر بولىپ جاتىر. ءبىراق، جىلۋ بەرۋ تولىقتاي توقتاپ قالعان جوق”، - دەيدى پرەمەر-مينيستر.
ۇكىمەت باسشىسىنىڭ ايتۋىنشا، بۇزىلعان ۋچاسكەلەردى نورماتيۆتىك مەرزىمدە قالپىنا كەلتىرۋ بويىنشا شۇعىل شارالار قابىلدانعان. پرەمەر-مينيستر اكىمدىكتەرگە تىرشىلىكتى قامتاماسىز ەتەتىن بارلىق جۇيەلەردىڭ جۇمىسىن ەرەكشە باقىلاۋدا ۇستاۋى قاجەتتىگىن ەسكەرتتى.
“اۆاريالار بولعان جاعدايدا بارىنشا شۇعىل ارەكەت ەتىپ، ءتيىستى شارالار قابىلداۋ كەرەك. حالىققا ناقتى جاعداي تۋرالى، جوندەۋ جۇمىستارى مەن جوسپارلى جۇمىستار تۋرالى دەر كەزىندە، وبەكتيۆتى ءارى تۇسىنىكتى اقپارات بەرۋ – ماڭىزدى ماسەلە. ايتپەسە، وتىرىك اقپارات پەن فەيك تاراپ كەتەدى”، - دەيدى ول.
ءاليحان سمايىلوۆ ءبىرقاتار ماسەلەگە نازار اۋداردى.
“بىرىنشىدەن، ەنەرگەتيكا، ونەركاسىپ مينيسترلىكتەرى، ءوڭىر اكىمدىكتەرى مەن ەنەرگيا وبەكتىلەرىنىڭ يەلەرى بارلىق جىلۋ جۇيەلەرىنىڭ تۇراقتى جۇمىسىن قامتاماسىز ەتۋى ءتيىس. ەكىنشىدەن، «قازاقستان تەمىر جولى» جانە «قازمۇنايگاز» ۇلتتىق كومپانيالارى ءبىرىنشى كەزەكتە جىلۋ ستانسيالارى مەن قازاندىقتارعا وتىننىڭ ۋاقتىلى جەتكىزىلۋىن قامتاماسىز ەتۋى قاجەت. ۇشىنشىدەن، ءوڭىر اكىمدىكتەرى جىلۋ وبەكتىلەرىنىڭ يەلەرىمەن بىرگە تۇراقتى جۇمىس ىستەيتىن جوندەۋ بريگادالارىنىڭ بولۋىن، شۇعىل جوندەۋ جۇمىستارى قاجەت بولعان جاعدايدا قوسالقى بولشەكتەردىڭ ءازىر تۇرۋىن قامتاماسىز ەتۋى كەرەك”، - دەيدى ول.
ءسوز سوڭىندا سمايىلوۆ جىلىتۋ ماۋسىمىنىڭ تۇراقتى ءوتۋى ءاربىر ءوڭىر اكىمىنىڭ جەكە باقىلاۋىندا بولۋى كەرەكتىگىن ەسكەرتتى.