نەگىزگى كاپيتالعا سالىنعان ينۆەستيسيالار 14،6% -عا ارتقان.
ۇلتتىق ەكونوميكا ءمينيسترى الىبەك قۋانتىروۆتىڭ مالىمدەۋىنشە، بيىلعى ون ءبىر ايدا قازاقستاننىڭ جالپى ىشكى ءونىمى 4،9%-كە ءوستى، دەپ حابارلايدى Almaty-akshamy.kz
"بيىل قانتار-قاراشا ايلارىنىڭ قورىتىندىسى بويىنشا قازاقستان ەكونوميكاسىنىڭ ءوسۋ قارقىنى 4،9%ء-تى قۇرادى. ونىڭ ىشىندە ناقتى سەكتور – 3،5%-كە، ال قىزمەت كورسەتۋ سالاسى – 5،6%-كە ءوستى. سالالار اراسىندا ەڭ جوعارى ءوسىمدى قۇرىلىس، ساۋدا، اقپارات جانە بايلانىس، سونداي-اق كولىك جانە قويمالاۋ كورسەتتى"، - دەدى قۋانتىروۆ.
ايتۋىنشا، نەگىزگى كاپيتالعا سالىنعان ينۆەستيسيالاردىڭ ءوسۋ قارقىنى 14،6% بولدى. ينۆەستيسيالار اعىنى اقپارات جانە بايلانىستا – 2،8 ەسەگە، كولىك جانە قويمالاۋدا – 58%-كە، ساۋدادا – 34%-كە، ءبىلىم بەرۋدە – 17%-كە، اۋىل شارۋاشىلىعىندا – 11%-كە، سونداي-اق ونەركاسىپتە – 8،5%-كە، ونىڭ ىشىندە وڭدەۋ ونەركاسىبىندە – 4،6%-كە ءوستى.
وڭىرلەر اراسىندا ەڭ جوعارعى ءوسىم ماڭعىستاۋ، تۇركىستان، اباي جانە پاۆلودار وبلىستارىندا بايقالدى.
الدىن الا قورىتىندى بويىنشا 2023 جىلعى قاڭتار-قازاندا سىرتقى ساۋدا تاۋار اينالىمى 2،6%-كە ءوسىپ، 114 ملرد دوللاردان استى. ەكسپورت 65 ملرد دوللارعا، ونىڭ ىشىندە وڭدەلگەن تاۋارلار ەكسپورتى 21 ملرد دوللارعا جۋىقتادى. تاۋارلار يمپورتى 49 ملرد دوللاردى قۇرادى. جالپى، وڭ ساۋدا بالانسى 15 ملرد دوللاردان استى.
مينيستر وڭدەۋ ونەركاسىبىندە دە وڭ ءوسىم ساقتالىپ وتىرعانىن اتاپ ءوتتى. ءوندىرىس كولەمى 3،4%-كە وسكەن. ماشينا جاساۋ ءوندىرىسى 27%-كە جۋىق، ونىڭ ىشىندە اۆتوموبيل جاساۋ – 41%-كە جانە ەلەكتر جابدىقتارىن جاساۋ – 32%-كە ۇلعايدى.
سونداي-اق ازىق-تۇلىك، مەتالل بۇيىمدارى، قۇرىلىس ماتەريالدارى، پلاستماسسا بۇيىمدارى، جەڭىل ونەركاسىپ پەن جيھاز وندىرىسىندە دە وڭ ءوسىم تىركەلگەن.
تاۋ-كەن ونەركاسىبىندەگى ءوندىرىس كولەمى 5،2%-كە جوعارلادى. بۇل رەتتە گاز ءوندىرۋ – 12%-كە، مۇناي ءوندىرۋ – 7،8%-كە، وزگە دە پايدالى قازبالاردى ءوندىرۋ –13%-كە ءوستى. مەتالل كەندەرىن ءوندىرۋ – 0،5%-كە، تاۋ-كەن ونەركاسىبىندە قىزمەت كورسەتۋ – 2،6%-كە، كومىر ءوندىرۋ 5،8%-كە تومەندەدى.