اتالمىش قۇجات ەلدەگى ەكولوگيانى جاقسارتۋعا ىقپال ەتەدى.
پارلامەنت سەناتىنىڭ پلەنارلىق وتىرىسىندا ق ر يندۋستريا جانە ينفراقۇرىلىمدىق دامۋ ءمينيسترى قايىربەك وسكەنبايەۆ «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ەلەكتر ەنەرگەتيكاسى، ەنەرگيا ۇنەمدەۋ جانە ەنەرگيا تيىمدىلىگىن ارتتىرۋ، جەر قويناۋىن پايدالانۋ، جەرگىلىكتى مەملەكەتتىك باسقارۋ جانە مەملەكەتتىك شەكارا ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ۇسىندى، دەپ حابارلايدى Almaty-akshamy.kz.
ۆەدومستۆو باسشىسى اتالعان زاڭ جوباسىن قابىلداۋ ەنەرگيا سىيىمدىلىعىن تومەندەتۋگە، ەلدەگى ەكولوگيالىق جاعدايدى جاقسارتۋعا جانە كومىرسۋتەك رەسۋرستارىنىڭ جاڭا تۇرلەرىن ءوندىرۋدى دامىتۋعا ىقپال ەتەتىنىن اتاپ ءوتتى.
«جوبا مەملەكەت باسشىسىنىڭ حالىققا ارناعان جولداۋىن جۇزەگە اسىرۋ اياسىندا كاسىپورىنداردىڭ ەنەرگيا تيىمدىلىگى بويىنشا تالاپتاردى كۇشەيتۋ، سونداي-اق پرەزيدەنتتىڭ الماتى قالاسىنداعى ەكىنشى جىلۋ ەلەكتر ورتالىعىن كومىردەن گازعا اۋىستىرۋدى قامتاماسىز ەتۋ جونىندەگى تاپسىرماسىن ىسكە اسىرۋ ماقساتىندا ازىرلەندى. سونىمەن قاتار، الماتى قالاسى ءماسليحاتى مەن اكىمدىگىنىڭ ساۋلەت-قالا قۇرىلىسى قىزمەتى سالاسىنداعى قۇزىرەتىن كەڭەيتۋ ۇسىنىلادى. وسى رەتتە بۇگىنگى تاڭدا ستانسيالاردى كومىردەن گازعا اۋىستىرۋعا باعىتتالعان ءىس-شارالار بويىنشا ينۆەستيسيالاردى قايتارۋ تەتىگى جوق ەكەنىن اتاپ وتكەن ءجون»،- دەلىنگەن يندۋستريا جانە ينفراقۇرىلىمدىق دامۋ مينيستلىگىنىڭ باسپا ءسوز قىزمەتىنىڭ حابارلاماسىندا.
زاڭ جوباسىندا ەنەرگيا ۇنەمدەۋ جانە ەنەرگيا تيىمدىلىگىن ارتتىرۋ سالاسىنداعى زاڭناما نورمالارىن جەتىلدىرۋگە، سونداي-اق بالامالى وتىن ءتۇرى رەتىندە گازدى پايدالانا وتىرىپ، گەنەراسيالايتىن قوندىرعىلاردى سالا وتىرىپ، جاڭعىرتۋ، رەكونسترۋكسيالاۋ جانە (نەمەسە) كەڭەيتۋگە ينۆەستيسيالاردى قايتارۋ تەتىگىن ەنگىزۋگە باعىتتالعان تۇزەتۋلەر كوزدەلەدى.
وسىلايشا، ءىرى كاسىپورىنداردا ەنەرگيا ۇنەمدەۋ بويىنشا جاۋاپتى تۇلعالاردى بەكىتۋ ۇسىنىلادى. سونىمەن بىرگە اتالعان زاڭ جوباسى ەنەرگيا اۋديتورلارىنا كانديداتتاردى اتتەستاتتاۋ جونىندەگى فۋنكسيالاردى پەرسونالدىڭ سايكەستىگىن راستاۋ جونىندەگى ورگاندارعا بەرۋدى كوزدەيدى. بۇل شارالار سالا ساراپشىلارىنىڭ كاسىبي دەڭگەيى مەن جۇرگىزىلەتىن ەنەرگيا اۋديتتەرىنىڭ ساپاسىن ارتتىرۋعا ىقپال ەتەدى دەپ كۇتىلۋدە.
جەكەلەگەن تۇزەتۋلەر مەملەكەتتىك شەكارا ارقىلى شەكارا بولىمدەرى جانە اۆتوموبيل وتكىزۋ پۋنكتتەرىنىڭ عيماراتتارى مەن قۇرىلىستارىن سالۋعا قاتىستى بولىپ تابىلادى.