قازاقستان ۇكىمەتى «قولجەتىمدى ينتەرنەت» ۇلتتىق جوباسىن بەكىتتى. ق ر پرەمەر-مينيسترى ءاليحان سمايىلوۆ ءتيىستى قاۋلىعا قول قويدى، دەپ حابارلايدى almaty-akshamy.kz
ۇلتتىق جوبا مەملەكەت باسشىسىنىڭ رەسپۋبليكانىڭ ينتەرنەت سالاسىن دامىتۋ جونىندەگى تاپسىرمالارىن ورىنداۋ ماقساتىندا قابىلداندى. ونىڭ نەگىزگى ماقساتى – حالىقتى جىلدامدىعى كەمىندە 100 مبيت/س كەڭ جولاقتى ينتەرنەتپەن قامتۋ.
«قولجەتىمدى ينتەرنەت» ۇلتتىق جوباسى 2024 جىلدان باستاپ 2027 جىلعا دەيىنگى كەزەڭدى قامتيدى جانە ونى ىسكە اسىرۋعا 1،5 ترلن تەڭگەدەن استام قاراجات كوزدەلگەن. ايتا كەتۋ كەرەك، بۇل سومانىڭ كولەمدى بولىگى، ياعني 1،3 ترلن تەڭگەدەن استامى – بيۋدجەتتەن تىس قاراجات.
جوبا اياسىندا ايتارلىقتاي قاراجات سىمدى جانە سىمسىز بايلانىس ينفراقۇرىلىمىن دامىتۋعا باعىتتالاتىن بولادى. اۋىلدىق جەرلەردە تالشىقتى-وپتيكالىق بايلانىس جەلىلەرىنىڭ تارماقتالعان جۇيەسىن سالۋعا باسا نازار اۋدارىلماق. ماسەلەن، مەملەكەتتىك-جەكەشەلىك ارىپتەستىك تەتىگى ارقىلى 3 مىڭنان استام اۋىلدا ءتيىستى بايلانىس جەلىلەرىن مونتاجداۋ جوسپارلانىپ وتىر.
جالپى شاعىن جانە ورتا بايلانىس وپەراتورلارىن قولداۋ ارقىلى 400 مىڭ ءۇي شارۋاشىلىعىنا جىلدامدىعى جوعارى ينتەرنەت تارتىلاتىن بولادى. جەكەمەنشىك وپەراتورلار تاراپىنان ينۆەستيسيالاردىڭ جالپى سوماسى 92 ملرد تەڭگە بولعان جاعدايدا، ونىڭ جارتىسىن مەملەكەت كۇردەلى شىعىندارعا سۋبسيديالار تۇرىندە قايتاراتىن بولادى.
ۇلتتىق جوبا اياسىندا رەسپۋبليكالىق جانە نەگىزگى وبلىستىق اۆتوجولداردى ءموبيلدى ينتەرنەتپەن قامتۋ ءۇشىن سيفرلىق ينفراقۇرىلىم سالۋ جوسپارلانعان. اتاپ ايتقاندا، 487 انتەننا-دىڭگەك قۇرىلىسىن ورناتۋ جوسپارلانىپ وتىر. بۇل 17 مىڭ شاقىرىم اۆتوجولدى ءموبيلدى ينتەرنەتپەن قامتۋعا مۇمكىندىك بەرەدى.
تاعى ءبىر باعىت 5G جەلىسىن ودان ءارى ورىستەتۋ بولماق. بۇگىنگى تاڭدا 605 بازالىق ستانسيا ورناتىلعان. 2025 جىلدىڭ سوڭىنا دەيىن 5G تەحنولوگياسىن رەسپۋبليكالىق ماڭىزى بار قالالار مەن وبلىس ورتالىقتارىنىڭ بارلىعىنا ەنگىزۋ جوسپارلانىپ وتىر. وسى جۇمىس اياسىنداعى بايلانىس وپەراتورلارىنىڭ ينۆەستيسيالارى شامامەن 300 ملرد تەڭگەنى قۇرايدى.
ۇلتتىق جوبا اياسىندا ءىرى دەرەكتەر ورتالىقتارىن جانە ترانسشەكارالىق تالشىقتى-وپتيكالىق ماگيسترالداردى سالۋ بويىنشا شارالار جوسپارلانعان. سونداي-اق رەسپۋبليكاعا جەتەكشى حالىقارالىق IT-كومپانيالاردى تارتۋ ءۇشىن زاڭنامانى وزەكتەندىرۋ قاجەت.
جالپى ۇلتتىق جوبانى ىسكە اسىرۋ 2027 جىلعا دەيىن قازاقستاندىقتاردى جىلدامدىعى جوعارى ينتەرنەتپەن قامتۋ دەڭگەيىن 100%-عا دەيىن جەتكىزۋگە جانە ەلدىڭ وڭىردەگى سيفرلىق حاب رەتىندەگى پوزيسياسىن نىعايتۋعا مۇمكىندىك بەرەدى.