ماۋسىم ايىندا قازاقستاندىق قانت زاۋىتتارى 38 مىڭ توننا ءونىم وندىرگەن. ونىڭ تەڭ جارتىسى تارازداعى كاسىپورىنعا تيەسىلى.
اۋىل شارۋاشىلىعى مينيسترلىگى ەلدەگى قانتقا دەگەن سۇرانىستى قاناعاتتاندىرۋ ءۇشىن قوسىمشا شارالاردى دا قولعا الىپ وتىر، دەپ حابارلايدى Almaty-akshamy.kz
ماسەلەن، شەت مەملەكەتتەردەن باج الىمىنسىز 250 مىڭ توننا قانت اكەلۋگە كۆوتا بولىنگەن. سونداي-اق وڭىرلەردى قامتاماسىز ەتۋ بويىنشا مونيتورينگ جاسالىپ وتىر. جۇكتىڭ جولدا تۇرىپ قالماي، ۋاقتىلى كەدەندىك راسىمدەۋ جۇرگىزىلۋى قاداعالاۋعا الىنعان. دەگەنمەن ازىرگە بۇل نارىقتاعى سۇرانىستى تولىقتاي وتەي الماي وتىر.
ۇكىمەت قانت بويىنشا جاعدايدى تۇراقتاندىرۋ جونىندەگى بەس جىلعا ارنالعان جوسپارىن ماقۇلدادى. وعان سايكەس، قانت قىزىلشاسىن ەگۋ الاڭدارىن كوبەيتۋ، سۋارۋ جەلىلەرىن جاڭعىرتۋ، قانت زاۋىتتارىن جاڭعىرتۋ، مەملەكەتتىك قولداۋ شارالارى جونىندەگى ءىس-شارالار جوسپارلانعان.