تارازداعى «قازفوسفات» زاۋىتى ۋاقىتشا جابىلۋى مۇمكىن

قازىرگى تاڭدا جوسپاردان تىس تەكسەرىس دايىندالىپ جاتىر.

تارازداعى «قازفوسفات» زاۋىتىن اۋاعا زياندى زاتتار تاراپ كەتۋىنە بايلانىستى ۋاقىتشا جابۋ كوزدەلىپ وتىر، دەپ حابارلايدى Almaty-akshamy.kz Astanatv.kz cىلتەمە جاساپ.

تارازداعى الىپ ءوندىرىس «قازفوسفات» زاۋىتىندا تەحنيكالىق اپات بولىپ، ودان شىققان قويۋ ءتۇتىن قالا كوشەلەرىنە جايىلدى. وبلىستىق ەكولوگيا دەپارتامەنتىنىڭ ماماندارى كاسىپورىن جۇمىسىن ۋاقىتشا توقتاتپاق. سەبەبى، اۋاعا زياندى كۇكىرت سۋتەگىنىڭ مولشەرى شامادان تىس تاراپ كەتكەن كورىنەدى. بۇل جاعداي تاۋلىگىنە ەكى رەت قايتالانعان. 

«سانيتارلىق قوعاۋ اۋماعىنان سىناما الىنىپ، ول جەردە كۇكىرت سۋتەك زياندى زاتتار انىقتالىپ، نورمادان تىس اسقانى انىقتالدى. قازىرگى تاڭدا جوسپاردان تىس تەكسەرىس دايىندالىپ جاتىر. زەردەلەۋ جۇمىستارى جۇرگىزىلىپ جاتىر. جوندەگەنگە دەيىن زاۋىت جۇمىسىن ۋاقىتشا توقتاتاتىن شىعارمىز»، - دەدى جامبىل وبلىسى ەكولوگيا دەپارتامەنتىنىڭ ءبولىم باسشىسى سەرىك نۇربايەۆ. 

زاۋىت ماماندارى دا بولعان وقيعانىڭ سەبەپتەرىن انىقتاپ جاتىر. «قازفوسفات» ج ش س باس ەكولوگى ارمان قاراعالييەۆتىڭ ايتۋىنشا، زاۋىت زەرتحاناسىندا زەرتتەۋ جۇرگىزىلگەن، سانيتارلىق ۋچاسكەلەر مەن قالا ماڭىندا دوزانىڭ شامادان تىس اسقانى تىركەلگەن جوق. 

ەستەرىڭىزگە سالا كەتسەك، شىلدەنىڭ 11 كۇنى «قازفوسفات مينەرالدى تىڭايتقىشتار» زاۋىتىندا اپات بولعان بولاتىن.