ۇكىمەت مۇشەلەرى جاڭا سۋ كودەكسىنىڭ قانداي بولاتىنىن ايتتى

قۇجاتتى ازىرلەۋشىلەر جوبانى پارلامەنتكە وسى جىلدىڭ سوڭىنا دەيىن ەنگىزۋدى كوزدەپ وتىر.

بۇگىن ۇكىمەت وتىرىسىندا ق ر ەكولوگيا، گەولوگيا جانە تابيعي رەسۋرستار ءمينيسترى سەرىكقالي برەكەشيەۆ جاڭا سۋ كودەكسىنىڭ نەگىزگى باعىتتارىن اتادى، دەپ حابارلايدى Almaty-akshamy.kz قازاقپاراتقا سىلتەمە جاساپ.

«جاڭا سۋ كودەكسىن ازىرلەۋ ماقساتىندا مينيسترلىك تاراپىنان رەتتەۋشىلىك ساياساتتىڭ كونسۋلتاتيۆتىك قۇجاتى دايىندالدى. ول بويىنشا قوعامدىق تالقىلاۋ باستالدى. ساراپشىلاردىڭ قاتىسۋىمەن ءتيىستى جۇمىس توبى قۇرىلدى. سونداي-اق، جاڭا سۋ كودەكسىنىڭ تۇجىرىمداماسىن ازىرلەۋگە كىرىستىك»، - دەدى سەرىكقالي برەكەشيەۆ.

جاڭا سۋ كودەكسىنىڭ نەگىزگى باعىتتارى مىناداي:

ءبىرىنشى. ەلدىڭ سۋ-رەسۋرستىق الەۋەتىن ساقتاۋ.

ەكىنشى. سۋ پايدالانۋشىلاردى سۋ ۇنەمدەۋ تەحنولوگيالارىن پايدالانۋعا ىنتالاندىراتىن تەتىكتەردى ايقىنداۋ.

ءۇشىنشى. سۋ شارۋاشىلىعى ينفراقۇرىلىمىن دامىتۋدى قولداۋ ءۇشىن مەملەكەتتىك-جەكە مەنشىك ارىپتەستىكتى قولدانۋدى ىنتالاندىراتىن تاريف بەلگىلەۋ مودەلىن قۇرۋ.

ءتورتىنشى. قازاقستاننىڭ سۋ رەسۋرستارى الەۋەتىن ەسەپكە الۋ جانە بولجاۋ، مونيتورينگتەۋدى سيفرلاندىرۋ، سونداي-اق سۋ رەسۋرستارىن باسقارۋداعى عىلىمنىڭ ءرولىن ارتتىرۋ.

بەسىنشى. ۇلتتىق زاڭنامانى حالىقارالىق قۇقىق قاعيداتتارىمەن ۇيلەستىرۋ. 

«جاڭا سۋ كودەكسىنىڭ جوباسىن پارلامەنت ماجىلىسىنە كەلەسى جىلدىڭ جەلتوقسان ايىندا ەنگىزۋدى جوسپارلاپ وتىرمىز»، - دەدى مينيستر.