بۇل تۋرالى پرەزيدەنت ۇكىمەتتىڭ كەڭەيتىلگەن وتىرىسىندا ايتتى.
«ءقازىر مەملەكەت بيۋدجەتىنىڭ جارتىسىنان كوبى الەۋمەتتىك سالاعا ءبولىنىپ جاتىر. سوڭعى جىلدارى الەۋمەتتىك سالاداعى ينفراقۇرىلىمدى دامىتۋ ءۇشىن ءبىراز جۇمىس اتقارىلدى. الەۋمەتتىك سالا ماماندارىنىڭ، اسىرەسە پەداگوگتەر مەن مەديسينا قىزمەتكەرلەرىنىڭ بەدەلىن ارتتىرۋعا باسا ءمان بەرىلدى. ەندى ازاماتتارعا كورسەتىلەتىن قىزمەتتىڭ ساپاسىن جاقسارتۋ قاجەت. بۇل – ەڭ الدىمەن، دەنساۋلىق ساقتاۋ سالاسىنا قاتىستى ماسەلە»، - دەدى پرەزيدەنت.
مىندەتتى الەۋمەتتىك مەديسينالىق ساقتاندىرۋ جۇيەسىنىڭ ىسكە قوسىلعانىنا 5 جىل بولدى. سودان بەرى بۇل سالانىڭ بيۋدجەتى ەكى ەسە ارتتى. بيىل 2،6 تريلليون تەڭگە بولىنەدى.
«الايدا، مەديسينالىق كومەكتىڭ ساپاسى ايتارلىقتاي جاقساردى دەپ ايتۋعا بولمايدى. كوپتەگەن قىزمەت ءالى دە قولجەتىمدى ەمەس. بۇدان بولەك، كوپ جاعدايدا رەسۋرستار ءتيىمسىز جۇمسالادى. سونىڭ سالدارىنان بۇل سالاعا قوسىمشا قارجى ءبولىپ، بيۋدجەتكە سالماق سالۋعا تۋرا كەلەدى. ۇكىمەت مەديسينالىق ساقتاندىرۋ جۇيەسىنىڭ قىزمەتىن قاتاڭ باقىلاۋعا الۋى كەرەك. بۇل جۇيە قاراپايىم ءارى تۇسىنىكتى بولۋعا ءتيىس»، - دەدى قاسىم-جومارت توقايەۆ.
سونىمەن بىرگە پرەزيدەنت مەديسينالىق كومەكتىڭ ءبىرىڭعاي توپتاماسىن قالىپتاستىرۋ قاجەتتىگىن ايتتى.
«مەملەكەت كەپىلدىك بەرەتىن مەديسينالىق قىزمەت ونىڭ بازالىق بولىگى بولۋعا ءتيىس. كەلەسى بولىگى جۇمىس بەرۋشىلەر مەن ازاماتتاردىڭ جارنالارىنان قۇرالاتىن ساقتاندىرۋ قاراجاتى ەسەبىنەن جاساقتالۋى كەرەك. جەرگىلىكتى اتقارۋشى ورگانداردىڭ جاۋاپكەرشىلىگىن ارتتىرعان ءجون. الەۋمەتتىك جاعىنان وسال توپتاعى كەيبىر ازاماتتار ءۇشىن مەديسينالىق ساقتاندىرۋ جۇيەسىنە اۋدارىلاتىن تولەمدەر جەرگىلىكتى بيۋدجەتتەن بولىنۋگە ءتيىس»، - دەدى مەملەكەت باسشىسى.